На базе кінатэатра “Беларусь” горада Петрыкава прайшоў абласны семінар “Удасканаленне рэпертуарнага планавання кінатэатраў”. У час мерапрыемства адбылася прэм’ера фільма “Чарнобыль. Жывая зямля”.
Семінар сабраў прадстаўнікоў кінаіндустрыі з усіх абласцей краіны, уключаючы дырэктараў кінатэатраў, праграмістаў, маркетолагаў і спецыялістаў па кінапрадукцыі.
Сустрэча была арганізавана з мэтай абмену вопытам, вывучэння найноўшых тэндэнцый у сферы кінапракату і распрацоўкі эфектыўных стратэгій для прыцягнення гледача ў кінатэатры. З прывітальным словам і прэзентацыяй Петрыкаўскага раёна выступіла намеснік старшыні райвыканкама Наталля Ходзька. Наталля Мікалаеўна пазнаёміла прысутных з асаблівасцямі Петрыкаўшчыны, падкрэсліўшы ўнікальнасць і патэнцыял раёна. Гасцям былі прадстаўлены памятныя і знакавыя аб’екты раёна, якія маюць гістарычную, культурную і прыродную каштоўнасць.
Падчас семінара ўдзельнікі абмеркоўвалі новыя стратэгіі і шляхі для далейшага развіцця.
Асаблівае месца ў праграме заняла прэм’ера фільма “Чарнобыль. Жывая зямля”.
Гэтая карціна прымеркавана да 40-й гадавіны аварыі на Чарнобыльскай АЭС.
Прыемна адзначыць, што прэм’ера прайшла з удзелам рэжысёра фільма Марыны Данекінай. Сустрэча з рэжысёрам стала сапраўдным падарункам для жыхароў Петрыкаўшчыны.
У адрозненне ад традыцыйных хронік, карціна факусуецца не толькі на падзеях 1986 года, але і на працэсе адраджэння жыцця на пацярпелых тэрыторыях праз прызму часу. Дакументальны фільм уяўляе ўнікальны погляд вачамі тых, хто быў у эпіцэнтры падзей: ліквідатараў, навукоўцаў, мясцовых жыхароў і відавочцаў. Сведчанні, пераплеценыя з навуковымі дадзенымі і назіраннямі за прыродай, раскрываюць неверагодную здольнасць зямлі да ацалення і адаптацыі. Менавіта гэтыя тры сілы – чалавек, навука і зямля – сталі галоўнымі героямі новай дакументальнай кінастужкі. На працягу 39 хвілін кінастужка распавядала пра гісторыю ліквідацыі аварыі на Чарнобыльскай АЭС, пераадоленне наступстваў аварыі і адраджэнне паўнацэннага жыцця ў пацярпелых рэгіёнах Беларусі.
Пасля прагляду фільма, які пакінуў глыбокі след у сэрцах гледачоў, Марына Данекіна падзялілася сваімі думкамі, расказала пра ідэі, якія ляглі ў аснову стужкі, і пра складанасці здымачнага працэсу.
– Ідэя стварэння фільма “Чарнобыль. Жывая зямля” нарадзілася з жадання паказаць не толькі падзеі таго часу, але і тое, як жыццё працягваецца, як прырода знаходзіць шляхі да аднаўлення. Мы хацелі падкрэсліць узаемасувязь чалавека, навукі і самой зямлі. Расказаць пра людзей, якія змагаліся з наступствамі аварыі, і неверагодную сілу жыцця, якая адраджаецца нават у самых складаных умовах, – адзначыла рэжысёр фільма.
Пасля цікавай і змястоўнай размовы адбылася афтограф-сесія, падчас якой кожны жадаючы мог атрымаць жаданы подпіс ад рэжысёра і асабіста выказаць сваю падзяку за такую важную і кранальную працу.
Фільм “Чарнобыль. Жывая зямля” – гэта не толькі напамін пра мінулае, але і сведчанне моцнай сілы беларусаў, згуртаванасці, жыцця і надзеі на будучыню.
Марыя ТАМКО,
фота аўтара.
Оставить комментарий