Сёння ўсё часцей мы гаворым пра неабходнасць самастойна клапаціцца аб пенсіі. У Беларусі ёсць інструменты, якія дазваляюць назапасіць дадатковую пенсію. Так, нараўне з дзяржаўнай салідарнай сістэмай, якая забяспечвае працоўныя і сацыяльныя пенсіі, у рэспубліцы дзейнічае праграма добраахвотнага страхавання дадатковай назапашвальнай пенсіі. Як яна рэалізуецца – пра гэта пагутарылі з начальнікам раённага аддзела Фонда сацыяльнай абароны насельніцтва Алесяй Ганчар.
Па інфармацыі суразмоўцы, праграма добраахвотнага страхавання дадатковай назапашвальнай пенсіі рэалізуецца на падставе Указа Прэзідэнта № 367, а адзіным страхоўшчыкам выступае дзяржаўнае прадпрыемства “Стравіта”.
– Хто можа стаць удзельнікам гэтай праграмы?
– Удзельнічаць можа працуючы грамадзянін, якому да пенсіі застаецца не менш за тры гады, і за якога працадаўца плаціць узносы ў Фонд сацыяльнай абароны насельніцтва. Пры гэтым самазанятыя, індывідуальныя прадпрымальнікі, а таксама асобы з інваліднасцю I ці II групы не могуць заключыць такую дамову. Яшчэ адна ўмова: працадаўца не павінен знаходзіцца ў стадыі ліквідацыі ці банкруцтва.
– Як уладкована сама сістэма назапашванняў?
– Работнік сам выбірае, які працэнт ад зарплаты – ад 1 да 10 – будзе штомесяц адлічваць на назапашвальную пенсію, а таксама тэрмін будучых выплат: 5 або 10 гадоў. Пры гэтым працадаўца абавязаны рабіць суразмерныя даплаты – але не больш за 3% – са сродкаў, прадугледжаных для выплаты абавязковага ўзносу ў ФСАН. Такім чынам, агульныя выдаткі працадаўцы на пенсійныя ўзносы не павялічваюцца.
– А што адбываецца з грашыма далей? Яны проста ляжаць на рахунку?
– Не. Узносы назапашваюцца на персанальным рахунку будучага пенсіянера, і на іх налічваецца даход – у памеры стаўкі рэфінансавання Нацыянальнага банка (цяпер гэта 9,75% гадавых). Акрамя таго, страхоўшчык мае права інвеставаць гэтыя сродкі ў адпаведнасці з заканадаўствам. Так назапашванні не толькі абаронены ад інфляцыі, але і прымнажаюцца. Плюс узносы ўдзельніка праграмы не абкладаюцца падаходным падаткам – гэта дадатковы бягучы даход.
– Наколькі гнуткай з’яўляецца праграма? Ці можна, напрыклад, змяніць памер адлічэнняў ці часова іх прыпыніць?
– Удзельнік можа мяняць тарыф (працэнт адлічэнняў) не часцей за адзін раз у год. Калі ўзнікаюць складаныя фінансавыя акалічнасці, выплату ўзносаў можна прыпыніць, а затым аднавіць у любы час. Пры гэтым на ўжо назапашаную суму прадоўжаць налічваць даходнасць і бонусы.
– Ці можна атрымаць гэтыя грошы да наступлення пенсійнага ўзросту?
– Датэрмінова забраць назапашванні нельга, нават калі чалавек выходзіць на пенсію раней за агульнаўстаноўлены тэрмін. Адзінае выключэнне – інваліднасць I або II групы: у гэтым выпадку выплаты робяцца адначасова. Калі застрахаваны грамадзянін сыходзіць з жыцця, яго зберажэнні ўспадкоўваюцца па законе.
– Ці ўплывае ўдзел у гэтай праграме на памер звычайнай працоўнай пенсіі?
– Ніяк не ўплывае. Памер працоўнай (салідарнай) пенсіі вызначаецца па тых жа правілах, што і ў работнікаў, якія не ўдзельнічаюць у добраахвотным страхаванні, – зыходзячы са стажу і заробку.
– Як чалавеку ўступіць у праграму?
– Дагавор можна заключыць у офісе “Стравіты”, анлайн праз асабісты кабінет на сайце кампаніі або ў яе прадстаўніка. Пасля падпісання дамовы і атрымання страхавога пасведчання трэба падаць копію дакумента працадаўцу разам з заявай, у якой просяць утрымліваць узнос з заробку і пералічваць яго ў “Стравіту”, і падаць сацыяльны падатковы вылік. Далей усе разлікі і пералічэнні бярэ на сябе працадаўца.
– Дзякуй за тлумачэнні.
Гутарыла Галіна КАЗАК.
Оставить комментарий