На прадпрыемствах АПК Петрыкаўшчыны пачаўся тэхагляд зернеўборачнай тэхнікі

Сёння карэспандэнты «ПН» наведалі мехдвор УП «Палессе-Аграінвест». Гаспадарка адным з першых прадпрыемстваў АПК якасна падрыхтавала і да намечанага графікам тэрміну прадставіла шэраг «караблёў палёў», якім у хуткім часе трэба будзе ўступіць ва ўборачную страду.

Дзяржаўны тэхнічны агляд — сур’ёзны экзамен.
— Спраўнымі камбайны з’яўляюцца толькі пасля праходжання тэхагляду, звяртаю на гэта асаблівую ўвагу. Своечасова падрыхтаваная тэхніка — гэта адсутнасць страт пры ўборцы культур, — адзначыў Дзмітрый Каленнік, галоўны дзяржаўны інспектар упраўлення сельскай гаспадаркі і харчавання Петрыкаўскага райвыканкама.
Толькі спраўны камбайн здольны захаваць саму машыну, жыццё механізатару, а таксама вырашчаны ўраджай. Таму ў працэсе тэхагляду зернеўборачнай тэхнікі асаблівая ўвага была нададзена працаздольнасці і экалагічнай бяспецы тэхналагічнага абсталявання, тэхнічнай спраўнасці сістэм і вузлоў, наяўнасці першасных сродкаў пажаратушэння, аптэчак, а таксама рэгістрацыйных дакументаў.
. Адзін за другім механізатары дэманстравалі якасць падрыхтаванасці свайго камбайна, паказваючы, як працуюць рулявая і тармазная сістэмы, светлавыя прыборы, ці спраўны стоп-сігнал.
. Падводзячы вынікі, Дзмітрый Каленнік адзначыў, што камбайнеры з вялікай адказнасцю падышлі да правядзення мерапрыемства. Допуск да ўдзелу ў палявых работах атрымала ўся зернеўборачная тэхніка гаспадаркі, прадстаўленая да агляду. Цяпер аграрыяў праэкзаменуе сама ўборачная.