У мінулую суботу галоўная палітычная пляцоўка краіны – Палац Незалежнасці – прымала актывістак Беларускага саюза жанчын Гомельшчыны, сярод якіх былі і прадстаўніцы Петрыкаўскага раёна.
Новы маштабны рэспубліканскі праект Беларускага саюза жанчын “Мы розныя, але мы адзіныя” стартаваў ва ўтульнай і адначасова ўрачыстай атмасферы. Сімвалічна, што першымі гасцямі Палаца Незалежнасці ў межах гэтай яркай ініцыятывы сталі менавіта прадстаўніцы Гомельскай вобласці. Гэта сустрэча нарадзілася з вельмі шчырай і душэўнай ініцыятывы. Падчас аднаго з пасяджэнняў у Доме БСЖ актывісткі Гомельшчыны выказалі запаветную мару – у Год беларускай жанчыны наведаць галоўную палітычную пляцоўку краіны. Кіраўнік дзяржавы Аляксандр Лукашэнка адказаў на гэту просьбу згодай, адчыніўшы дзверы палаца для таленавітых і неабыякавых беларусак з усіх рэгіёнаў.
Сапраўдным і вельмі каштоўным падарункам для дэлегацыі стала сама экскурсія. Яе для жанчын Гомельшчыны правяла прэс-сакратар Прэзідэнта Наталля Эйсмант, якая не проста паказала залы, дзе прымаюцца лёсавызначальныя для суверэннай Беларусі рашэнні і вырашаюцца важныя палітычныя пытанні сусветнага маштабу, але і падзялілася ўнікальнымі дэталямі дзяржаўных будняў, якія звычайна застаюцца па-за кадрам тэлевізійных навін.
Кожны куток палаца захапляе сваім убранствам, але найбольшы гонар, па словах прадстаўніц Петрыкаўшчыны, выклікала тое, што ўся гэтая веліч створана рукамі беларускіх майстроў. Будынак узведзены з беларускіх матэрыялаў і напоўнены айчынным каларытам – усё зроблена беларусамі і для беларусаў.
Асаблівую ўвагу дэлегацыі прыкавала выстава падарункаў ад кіраўнікоў іншых дзяржаў і сусветных дзеячаў, а таксама багаты музей палаца. Ну а момант, калі жанчыны спыніліся каля прыёмнай Прэзідэнта, стаў адным з самых хвалюючых падчас экскурсіі, бо менавіта там адчуваўся найвышэйшы пульс кіравання дзяржавай.
А яшчэ візіт паклаў пачатак прыгожай традыцыі: кожная абласная дэлегацыя прывязе ў сталіцу сваю часцінку самабытнай выцінанкі, каб разам стварыць унікальны арт-аб’ект – “Карту адзінства”, якая стане зборным вобразам прыгажосці, сілы і вернасці беларускіх жанчын.
Эстэтыка, вытанчанасць і маштаб працы нашых творцаў пакінулі ў прадстаўнікоў Петрыкаўшчыны незабыўнае ўражанне і пачуццё гонару за свой народ.
Убачыць на свае вочы вядомыя на ўвесь свет залы, прагуляцца па калідорах, якія памятаць дзясяткі сусветных лідараў, адчуць атмасферу, у якой працуе кіраўнік дзяржавы – значыць адчуць сваё дачыненне да лёсу краіны, упэўнена акушэр УАЗ “Петрыкаўская ЦРБ” Марыя Шамра:
– Я вельмі ўдзячна за прадстаўленую магчымасць пабываць у Палацы Незалежнасці, дзелавым сэрцы нашай краіны. Тут асаблівая абстаноўка. Уразіла ўсё: інтэр’еры палаца, выстава падарункаў Прэзідэнту, літаральна кожная дэталь.
– Палац Незалежнасці – гэта не толькі палітычная пляцоўка, але і культурны цэнтр, у якім прадстаўлены ўнікальныя творы дэкаратыўна-прыкладнога мастацтва, жывапісу. Тут дзеецца гісторыя ў кожнай зале. Эмоцыі ад убачанага і пачутага перапаўняюць, – прызналася аператар машыннага даення СУП “Палессе-Аграінвест” Марыя Лімарава.
Дарэчы, і самі ўдзельніцы экскурсіі адзначыліся стыльнымі рашэннямі. Калега з Мазырскай раённай газеты “Жыццё Палесся” прыехала ў футболцы з партрэтам Прэзідэнта з крылатай цытатай «Жанчына – галоўнае. Як яна скажа, так і павінна быць» Гэта новая прапанова ў лінейку адзення пад знакам “Мерч Першага”. Дарэчы, упершыню ідэі для мерча прапануюць не спецыялісты, якія гэтым займаюцца, а сам народ. Беларускі саюз жанчын прапанаваў пашырыць гэтую ініцыятыву і аб’явіць конкурс крылатых цытат Прэзідэнта, прысвечаных жанчыне.
Галіна КАЗАК.
Фота аўтара.
Оставить комментарий