Напярэдадні форуму мы сустрэліся з загадчыкам Капцэвіцкай амбулаторыі ўрача агульнай практыкі УАЗ “Петрыкаўская ЦРБ” Тамарай Стакан.
“Вельмі прыемна, што маю працу так высока ацанілі і мне надарылася сагчымасць стаць удзельніцай такога важнага мерапрыемства!” – пасля слоў віншавання адзначыла Тамара Аляксееўна.
Загадчык амбулаторыі сціпла і ў той жа час з вялікай любоўю распавяла пра нюансы работы сельскай амбулаторыі, дружны калектыў аднадумцаў-прафесіяналаў, выпадкі з багатай урачэбнай практыкі.
З 2013 года загадвае Капцэвіцкай амбулаторыяй наша гераіня. Папярэднім месцам працы быў Рэспубліканскі навукова-практычны цэнтр радыяцыйнай медыцыны і экалогіі чалавека. Што прымусіла кандыдата медыцынскіх навук, вопытнага імунолага-алерголага змяніць накірунак прафесійных інтарэсаў і пераехаць у сельскую мясцовасць? Як падзялілася наша гераіня, вялікая прафесійная загружанасць яе і мужа, які, між іншым, таксама ўрач, у нейкі момант стала прычынай таго, што яны перагледзелі жыццёвыя арыенціры на карысць 3-х сыноў. Па прашэсці часу, упэўнены – рашэнне пераехаць у сельскую мясцоваць было правільнае: дзеці атрымалі належнае выхаванне і адукацыю, прывучаны да працы і пастаяннага самаразвіцця (старэйшыя жывуць і працуюць у Гомелі, малодшы – вучань мясцовай школы), а прафесійную практыку
Тамара Аляксееўна па-ранейшаму мае багатую і разнастайную.
На сённяшні дзень у зоне прафесійнага клопату ўрача – амаль 1800 чалавек, якія пражываюць на тэрыторыі Капцэвіцкага сельскага Савета.
На шчасце, павольны ўклад жыцця ў Капцэвічах дазваляе доктару надаць пацыентам столькі часу, колькі патрэбна. І нават крыху больш.
– Ні адміністрацыйная, ні навуковая праца не захапляюць мяне настолькі, як жаданне разабрацца ў кожным дыягназе, знайсці прычыну захворвання. Лячыць – гэта на ўсе 100% мая справа, – дзеліцца суразмоўца. – У сярэднім у амбулаторыю за дзень звяртаецца 30 пацыентаў. Жанчыны звяртаюцца часцей, у асноўным са скаргамі на высокі ціск і праблемы з сэрцам. А вось з мужчынамі складаней – яны неахвотна ідуць на прыём да ўрача, даводзіцца шмат размаўляць, пераконваць пачаць лячэнне.
Увогуле, імкнуся арганізаваць дзень так, каб спакойна пагутарыць з кожным чалавекам і глыбока ўнікнуць у яго праблемы са здароўем. Таму, на жаль, усю ўрачэбную дакументацыю даводзіцца весці дома ў вячэрні час.
Акрамя добрых узаемаадносінаў з мясцовымі жыхарамі, Тамара Аляксееўна плюсам сваёй працы ў сельскай мясцовасці лічыць прыроду краю. Пра што яшчэ можна марыць, калі на душы спакойна, а на сэрцы радасна. Хіба што, каб пацыенты мелі больш адказнасці за ўласнае здароўе.
Пра доктара адміністрацыя і калегі гавораць як пра сапраўднага прафесіянала, надзейнага і безадмоўнага. Пацыенты адчуваюць уважлівае стаўленне да сябе і адказваюць на гэта вялікай удзячнасцю і павагай.
Оставить комментарий