Працоўныя паездкі кіраўніцтва раёна па сельскагаспадарчых арганізацыях працягваюцца. Чарговым аб’ектам, які наведаў старшыня райвыканкама Яўгеній Шкробат, стаў малочна-таварны комплекс “Ляскавічы” ААТ “Агра-Ляскавічы”.
Гэты сучасны, высокатэхналагічны комплекс, уведзены ў эксплуатацыю не так даўно, знаходзіцца на асабістым кантролі кіраўніка раённай вертыкалі ўлады. Мэта візіту насіла планавы, але максімальна прадметны характар – кантроль за захаваннем пагалоўя, ацэнка гатоўнасці аб’ектаў да зімы і пераход на зімова-стойлавы перыяд.
На сённяшні дзень агульнае пагалоўе комплексу складае 2050 галоў буйной рагатай жывёлы, і кожная група патрабуе індывідуальнага тэхналагічнага падыходу.
Маршрут руху кіраўніка раёна па ферме быў распісаны літаральна пакрокава, што дазволіла дэталёва вывучыць арганізацыю вытворчасці на кожным участку. Візіт пачаўся з асноўнага кароўніка, дзе ўтрымліваецца матачнае пагалоўе – 900 галоў малочнага статка. Менавіта адсюль паступае галоўны прадукт гаспадаркі. Побач, у асобнай секцыі, старшыня азнаёміўся з утрыманнем і ходам адкорму 96 кароў.
Вялікая ўвага падчас маніторынгу была нададзена будучыні фермы – узнаўленню статка і вырошчванню маладняку. Кіраўнік раёна наведаў секцыю для цёлак пад асемяненне, дзе зараз знаходзіцца 250 галоў, а таксама паглядзеў, у якіх умовах утрымліваюцца 115 ужо асемянённых жывёл. Наступным пунктам сталі цялятнікі розных узроставых груп. Спачатку старшыня наведаў прафілакторый, дзе пагутарыў з даглядчыкамі і праверыў стан самых маленькіх гадаванцаў – тут зараз падрастае 250 цялят. Затым кіраўніцтва накіравалася да маладняку ва ўзросце ад 3 да 6 месяцаў. На дзень праверкі ў цялятніку налічвалася 186 жывёл. Тут дэталёва вывучаліся пытанні арганізацыі паення і кармлення жывёлы.
Аднак галоўнай тэмай дэталёвага разбору на МТК “Ляскавічы” стала карэкціроўка рацыёну кармлення пры пераходзе на зімовы рэжым. Гэты накірунак у гаспадарцы носіць строга сістэмны характар і цалкам заснаваны на навуковым падыходзе і лабараторных даследаваннях кармоў. Кожныя два тыдні сілас і сенаж адпраўляюцца на аналіз для вызначэння іх пажыўнасці. Спецыялісты сочаць за збалансаванасцю кармавога стала, утрыманнем бялку, крухмалу і пратэіну, каб рацыён забяспечваў максімальную малакааддачу.
На ферме створаны ўсе ўмовы і распрацавана электронная база дадзеных, дзякуючы якой працэс цалкам кантралюемы: асобнае, дакладна выверанае “меню” сфарміравана для кожнай тэхналагічнай групы. Свой рацыён маюць каровы ў цэху раздоя, сярэднеўдойныя жывёлы, а таксама каровы ў запускных секцыях першага і другога перыядаў сухастою.
Падводзячы вынікі візіту, старшыня райвыканкама зрабіў акцэнт на чалавечым фактары і хвіліннай дакладнасці ўсіх працэсаў:
– Пераход на зімова-стойлавы перыяд – гэта экзамен на трываласць, дзе вынік залежыць ад выканання тэхналогій. У сучаснай жывёлагадоўлі дробязяў няма, усё працуе як адзіны і вельмі сур’ёзны механізм. На ферме створана выдатная база, ёсць усе ўмовы для кантролю, распісаны рацыёны для кожнай групы. Цяпер галоўнае – рабіць усё строга па інструкцыі і своечасова. Вось выбіліся з графіка пры кармленні або даенні ўсяго на 15 хвілін – і сістэма тут жа дае збой, а гаспадарка атрымлівае памяншэнне надояў. Тэхналагічная дысцыпліна і адказнасць кожнага работніка на сваім месцы – гэта тое, што гарантуе нам высокія вытворчыя паказчыкі, прывагі і якаснае малако, – рэзюмаваў кіраўнік раёна.
Па выніках праверкі перад калектывам і спецыялістамі МТК “Ляскавічы” пастаўлены канкрэтныя задачы па бездакорным захаванні тэхналагічнага ланцужка ў зімовы перыяд.
Галіна КАЗАК.
Фота аўтара.
