Апошні месяц восені прынясе жыхарам краіны шэраг важных змяненняў. Новаўвядзенні закрануць сацыяльныя выплаты, камунальныя рахункі, тарыфы на сувязь, а таксама правілы для аўтааматараў і аматараў рыбалкі.
Каротка знаёмім з галоўнымі навацыямі лістапада.
Рост сацыяльных выплат і пенсій
З 1 лістапада традыцыйна пераглядаюцца памеры бюджэту пражытачнага мінімуму. Услед за ім аўтаматычна павялічацца памеры розных дзяржаўных дапамог, у тым ліку аднаразавых выплат пры нараджэнні дзяцей, а таксама мінімальных працоўных, сацыяльных пенсій і “ўзроставых” надбавак для пажылых людзей.
Новыя тарыфы на інтэрнэт і тэлефон
Нацыянальны аператар “Белтэлекам” з 1 лістапада павышае кошт некаторых паслуг для фізічных асоб і арганізацый. Падаражэнне закране гарадскую і міжгароднюю сувязь, інтэрнэт byfly і папулярныя пакеты паслуг (напрыклад, лінейку “ЯСНА”). У сярэднім абаненцкая плата вырасце на 1-2 рублі.
Заплаці падаткі і жыві спакойна
Надыходзіць фінальны тэрмін для разліку з дзяржавай па маёмасных падатках. Унесці адзіны маёмасны плацеж (які аб’ядноўвае зямельны, транспартны падаткі і падатак на нерухомасць) неабходна не пазней за 16 лістапада. Зрабіць гэта можна ў банку, на пошце альбо праз сістэму АРІП.
Палёгка для пакупнікоў аўто
З 16 лістапада пакупнікам аўтамабіляў больш не давядзецца паўторна праходзіць тэхнічны агляд пры змене ўласніка. Калі ранейшы дазвол на допуск да ўдзелу ў дарожным руху яшчэ дзейнічае, ён будзе аўтаматычна пераносіцца на новага гаспадара.
Адказнасць за “аўтахлам”
З 13 лістапада ўступаюць у сілу больш жорсткія правілы ў дачыненні да кінутых машын у дварах. Цяпер адказнасць за эвакуацыю і ўтылізацыю кінутага транспарту змогуць ускладаць не толькі на юрыдычнага ўладальніка, але і на асоб, якія фактычна карысталіся аўто ці страхавалі яго апошнім часам.
Школьныя канікулы і рыбныя забароны
З 1 па 8 лістапада ў беларускіх школьнікаў пройдуць першыя ў гэтым навучальным годзе асеннія канікулы. За парты дзеці вернуцца 9 лістапада.
А вось для аматараў рыбалкі з 1 лістапада ўводзіцца сезонная забарона на вылаў сома звычайнага (па 31 сакавіка) і сіга чудскага (па 15 снежня) з-за перыяду іх зімоўкі і нерасту.
Падрыхтавала Галіна КАЗАК.
