Не трэба дзівіцца, убачыўшы сельскагаспадарчую тэхніку на палях у студзені месяцы. Пачынаючы з восені і, пры дапушчальнай тэмпературы ў зімовы перыяд, сельгаспрадпрыемствы здзяйсняюць зяблевае ўзворванне. Даказана: такі від апрацоўкі глебы служыць аптымальным рашэннем для падрыхтоўкі яе да вясновай сяўбы.
Такую важную працу, як узняцце зябліва, у ААТ “Чалюшчавічы” даверылі сапраўднаму прафесіяналу, механізатару з дваццацігадовым стажам Мікалаю Марціновічу. Карэспандэнты “Петрыкаўскіх навін” сустрэліся з героем на палях, паблізу аграгарадка Колкі, дзе трактарыст рыхтаваў глебу для сяўбы кукурузы ў вясновы перыяд.
– Перавагу такога ўзворвання цяжка пераацаніць: гэта не толькі падрыхтоўка зямлі, але і выдаленне рэштак папярэдняй культуры, унясенне ўгнаенняў, барацьба са шкоднікамі і пустазеллем, – дзеліцца Мікалай Мікалаевіч. – Работы па ўзворванні сельгасугоддзяў вядуцца з позняй восені. У гэтую зіму надвор’е спрыяе для гэтых мэт выкарыстоўваць і зімовы перыяд для падрыхтоўкі тэрыторыі для будучага ўраджаю. Вясною, перад сяўбой культуры, механізатарам спатрэбяцца толькі культыватары.
Аграрый дзеліцца, што ўсяго да пасяўной кампаніі 2025 года ў гаспадарцы падрыхтавана дадзеным спосабам каля трох тысяч гектараў зямлі. Механізатар з гонарам расказвае, што два гады як ён працуе на новым “Беларусе”. Мужчына не толькі кіруе тэхнікай, ён майстэрскі ўмее спраўляцца са шматлікімі падвеснымі і прычапнымі агрэгатамі і механізмамі. Вопыту і практыкі ў нашага героя дастаткова. Будучы выпускніком Вялаўскай школы, атрымаў правы “Кіроўца. Трактарыст”.
Практычна пасля атрымання сярэдняй адукацыі сеў за руль “жалезнага каня” ў родным зарэчным калгасе “Прыпяцкі”. Пасля службы ў войску вярнуўся да працы трактарыста, аб чым не шкадуе ні дня. Пры асабістых зносінах становіцца зразумелым: зямляк глыбока разумее прафесію земляроба, адказна ставіцца да яе, імкнецца зрабіць усё найлепшым чынам. Ён ведае, што ад якасці яго працы напрамую залежаць дружныя ўсходы на палях.
– У нашай гаспадарцы ўсе імкнуцца працаваць на вынік. Працуем спакойна, упэўнена, з настроем на ўраджай. Адчуваецца высокая адказнасць і зацікаўленасць кіраўніцтва сельгаспрадпрыемства за справу, прысутнічае камандны дух у калектыве, – дзеліцца механізатар. – Вядома, праца трактарыста практычна круглы год патрабуе вытрымкі, але такая праца ў нашай гаспадарцы на пачэсным месцы: годная заработная плата, арганізаваны падвоз людзей з райцэнтра, ёсць пэўныя сацыяльныя гарантыі для работнікаў. Усё гэта адбіваецца на дабрабыце маёй сям’і – жонкі і дачкі. За такое мірнае і ўпэўненае жыццё і годныя ўмовы працы я пайду заўтра галасаваць на выбарах Прэзідэнта Рэспублікі Беларусь.
У народзе пра паднятае зябліва кажуць: зямлю нібы залагоджваюць, каб тая з удзячнасцю прыняла ўсе зярняткі. Хай яно будзе так на нашай роднай зямлі. Жадаем нашым аграрыям спакойнай і камфортнай працы на палях Петрыкаўшчыны. Бо іх стараннямі закладваецца заўтрашні ўраджай хлеба на стале.
Святлана СОБАЛЕВА,
фота аўтара.
Оставить комментарий