Вось і прыйшла зіма, самая сапраўдная – са снегам ды маразамі. Апрача клопату па вызваленні падворкаў і прыватнага транспарту ад снежнай коўдры, вока пачынаюць радаваць краявіды, так бы мовіць, у халодных адценнях з імжыстымі галінкамі дрэў і ружова-барвовымі заходамі сонца са слупамі дыму над комінамі хат. Але ці багата людзей згадаюць, што ў час халадоў нялішнім было б і пакарміць птушак?
Днямі мы як раз сталі сведкамі такой высакароднай справы: вучні 7-га класа першай гарадской школы развешвалі кармушкі ў цэнтральным парку. Зроблены яны былі на занятках працоўнага навучання пад кіраўніцтвам настаўніка Уладзіміра Рога.
Кармушкі хлопцы рабілі сумленна з трывалых драўляных дэталяў. Кожны вучань праявіў фантазію, таму і вырабы выглядаюць разнастайна – хоць на выставу адпраўляй. Як паведамілі юныя майстры, падобнай справай кожны з іх займаўся і раней: нехта адвёз птушыную “сталоўку” да бабулі, іншы прымацаваў на двары свайго дому.
Настаўнік працоўнага навучання Уладзімір Рыгоравіч паведаміў, што сямікласнікі майструюць кармушкі ўжо шмат гадоў запар загадзя – да надыходу зімы была зроблена 21-на “птушыная сталоўка”: сем знайшлі свае месцы ў парку, восем – на тэрыторыі школы і яшчэ шэсць пакуль яшчэ не ўсталяваныя.
Вучні ж восьмага класа ўжо пачынаюць займацца вырабам шпакоўняў, каб увесну тэрмінова размясціць іх на дрэва да прылёту птушак з выраю.
Напрыканцы нашай размовы хлопцы падзяліліся назіраннямі, маўляў, у горадзе можна сустрэць кармушкі і ва ўстановах адукацыі, і ў дварах дамоў, але, пэўна, гэтага недастаткова каб дапамагчы птушкам харчавацца. Таму і прапанова заняцца такой добрай справаю выклікала задавальненне.
Нам жа застаецца толькі падзякаваць прадстаўнікам падрастаючага пакалення за іх учынак – стваральная справа заўсёды прыносіць дабро – і павінна вяртацца з лішкам.
Арцём ГУСЕЎ, фота аўтара.
Оставить комментарий