Сенатары вобласці наведалі Петрыкаўскае дзяржаўнае спецыяльнае прафесійна-тэхнічнае вучылішча закрытага тыпу нумар 1 лёгкай прамысловасці.
У пачатку сустрэчы дырэктар установы Таццяна Білас правяла для гасцей экскурсію па ўстанове, пазнаёміла з умовамі знаходжання выхаванак у кантэксце іх рэсацыялізацыі: пражываннем, адукацыйным працэсам, арганізацыяй адпачынку і псіхалагічнай працы.
Як адзначыла Таццяна Уладзіміраўна, асноўная ўвага ў працэсе адукацыі дзяўчынак надаецца пытанням іх рэсацыялізацыі.
– Мэта – з дапамогай адукацыі, псіхалагічнай дапамогі, арганізацыі вольнага часу вярнуць іх у грамадства, даць ім шанец пачаць жыццё з чыстага ліста, – сказала кіраўнік.
Далей Таццяна Уладзіміраўна паказала пакоі, у якіх дзяўчынкі спяць, працуюць, адпачываюць, займаюцца спортам. Асноўны від іх працы – шыццё адзення. Гэта форма і для заняткаў, і для працы, і для паказу мод.
– Акрамя таго, што дзяўчынкі ходзяць на школьныя заняткі, яны яшчэ і займаюцца творчасцю: танцуюць, спяваюць, удзельнічаюць у конкурсах, выставах, педагогі ўсяляк імкнуцца разнастаіць іх вольны час, напоўніць жыццё новымі фарбамі.
Затым для гасцей выхаванцы падрыхтавалі канцэрт. Менавіта тут дзяўчынкі раскрыліся як сапраўдныя артысткі і нават мадэлі. Падрыхтаваную калекцыю сукенак презентавалі дзяўчынкі гасцям сустрэчы.
–У нашай краіне вялікая ўвага надаецца выхаванню і развіццю дзяцей, – адзначыў член Савета Рэспублікі Нацыянальнага сходу Рэспублікі Беларусь Алег Слінько. – Кожны можа атрымаць бясплатна сярэднюю, спецыяльную і першую вышэйшую адукацыю. Сёння я прыемна здзіўлены вашымі ўмовамі пражывання. Уражвае, з якой любоўю і клопатам педагогі перадаюць усе лепшыя традыцыі падрастаючаму пакаленню. У гэтае свята жадаю, каб цяжкасці вашыя былі часовымі і вы сталі годнымі грамадзянамі нашай краіны.
З прывітальным словам выступіў старшыня Гомельскага абласнога аб’яднання прафсаюзаў Аляксей Нявераў. Прадстаўнік улады выказаў словы падзякі калектыву ўстановы за сумленную працу ў выхаванні маладых падапечных, за тыя сапраўды сямейныя адносіны, якія складваюцца паміж дзяўчынкамі і іх настаўнікамі.
– Дзень абароны – свята не ў класічным яго разуменні, а хутчэй дзень, які нагадвае нам, дарослым, што дзяцей трэба любіць і засцерагаць не толькі 1 чэрвеня, а і ўвесь астатні час, – канстатаваў Аляксей Мікалаевіч.
Да прысутных звярнулася член Пастаяннай камісіі Савета Рэспублікі па адукацыі, навуцы, культуры і сацыяльным развіцці, старшыня Гомельскай абласной арганізацыі рэспубліканскага грамадскага аб’яднання “Беларускае Таварыства Чырвонага Крыжа” Ала Смоляк:
– Дарагія дзяўчаты, сёння першы дзень лета. Шчыра жадаю вам прыгажосці, здароўя, дабрабыту. Спадзяюся, што ваша расстанне з блізкімі хутка скончыцца і вы будзеце ўспамінаць гэтую ўстанову з цеплынёй, бо тут вам ствараюць усе ўмовы. Вы жывеце ў прыгожай і выдатнай краіне. Усё ў вас атрымаецца!
Пасля канцэрту сенатары ўручылі дзяўчатам салодкія падарункі. Гутарка з дзяўчынкамі працягнулася ў нефармальнай абстаноўцы.
Наталля ПЕТРУШЭНКА.
Фота аўтара.
Оставить комментарий