30 кастрычніка на базе раённага Дома культуры прайшоў конкурс “Лепшая маладая сям’я Петрыкаўшчыны 2024 года”.
Сям’я – гэта адна з найвялікшых каштоўнасцей, створаных чалавецтвам за ўсю гісторыю свайго існавання. У ёй закладваецца фундамент ідэйнага, эстэтычнага, маральнага, філасофскага вопыту дзіцяці, яго ўяўленні пра дабро і зло, асновы разумовага, маральнага і фізічнага аблічча будучага грамадзяніна сучаснага грамадства.
Конкурс “Лепшая маладая сям’я Петрыкаўшчыны 2024 года” даў цудоўную магчымасць удзель-нікам папрацаваць разам, стаць сапраўднай камандай, якой па сіле справіцца з любымі цяжкасцямі.
Першы этап конкурсу – “Мая сям’я – маё багацце” заключаўся ў наступным: удзельнікі павінны былі арганізаваць выставу-прэзентацыю, якая адлюстроўвае традыцыі іх сям’і і роднага рэгіёна, радавод сям’і, захапленні і магчымасці ўсіх членаў сям’і. Дарэчы, бацькі справіліся з заданнем добра: кожны з прысутных мог разгледзець яркія фотаздымкі ўдзельнікаў, каб даведацца падрабязней пра кожную маладую сям’ю.
Другі этап конкурсу прайшоў пад назвай “Сям’я са знакам якасці”. Сем’і-ўдзельнікі ў адвольнай мастацкай форме прадставілі візітную картку: гісторыю свайго знаёмства, сямейныя традыцыі, спартыўныя захапленні. Гісторыі знаёмства кожнай сямейнай пары па-свойму цікавыя і нават у нечым забаўляльныя. Пасля расказаў удзельнікаў яшчэ больш пачынаеш верыць у наканаванасць лёсу.
Паспрабавалі сябе ўдзельнікі і ў іншых конкурсах, адзін з якіх даў магчымасць кожнай сям’і ўспомніць па адным фрагменце савецкі мультфільм. Уразіла тое, што на дапамогу бацькам прыйшлі дзеці, якія з радасцю і даволі хутка пазналі і персанажа, і сам мультфільм.
Творчыя нумары вучняў гарадскіх школ далі магчымасць сем’ям-удзельнікам адпачыць і падрыхтавацца да наступных этапаў конкурсу.
Васіліна Маслава, адна з членаў журы, звярнулася да ўдзельнікаў мерапрыемства і падзякавала кожнаму за іх актыўнасць, талент і за цудоўны падыход да мерапрыемства.
Па выніках конкурсу дыпломамі былі ўзнагароджаны сям’я Крэса і сям’я Некрашэвіч. На абласным этапе конкурсу Петрыкаўскі раён будзе прадстаўляць сям’я Марыны і Ігара Некрашэвіч.
Жадаем поспехаў і моцнага здароўя! Сям’я – гэта каманда, якая моцная толькі тады, калі разам!
Анастасія КІСЕЛЁВА.
Фота аўтара.
Оставить комментарий