З надыходам халадоў падрыхтоўка тэхнікі да работы ў новым сезоне – адзін з клопатаў сельгасарганізацый Петрыкаўшчыны.
Кожны механізатар, адпра-цаваўшы пасяўную і ўборачную кампанію, рыхтуе сваю тэхніку да новага сезона. Не з’яўляецца выключэннем і Ігар Чычыкайла, трактарыст ААТ “Навасёлкі”. Менавіта за такой адказнай справай яго, як і другіх механізатараў гаспадаркі, застала карэспандэнт раённага выдання на машынным двары ў Камаровічах.
– Перад намі пастаўлена задача – своечасова адрамантаваць тэхніку, каб потым, на пачатку пасяўной, не марнаваць на гэта дарагі час, – дзеліцца аграрый. – Да справы падыходзім адказна і рамонт сур’ёзных паломак плануем завяршыць да Новага года.
Суразмоўца пазначае: умовы для працы створаны. Зараз надвор’е дазваляе рамантаваць тэхніку на двары і пад навесамі, а калі тэмпература панізіцца – работы будуць весціся пры зачыненых дзвярах. Абсталяванне дазваляе тут жа, у майстэрні, ажыццяўляць зварачныя і такарныя работы, што таксама станоўча ўплывае на ўвесь працэс. Гаспадарка забяспечыла неабходнымі запчасткамі.
– Безумоўна, у першую чаргу ўвага надаецца тэхніцы, якая будзе задзейнічана на веснавой сяўбе. Затым чарга дойдзе да глебаапрацоўчых і пасяўных агрэгатаў, сеялак, плугоў, дыска-тараў, культыватараў. Тэрмін пастаноўкі на лінейку гатоўнасці глебаапрацоўчай тэхнікі і пасяўных агрэгатаў перад механізатарамі пастаўлены. З наступленнем сезона тэхніка своечасова выйдзе на поле, – упэўнены сельгаснік.
Зацікаўленасць у выніках працы ў механізатараў вялікая. Ігар Адамавіч не хавае, у сваім камбайне ведае кожны вінцік, кожную гаечку. Ужо сямнаццаць гадоў аграрый за баранкай свайго камбайна, на папярэднім адпрацаваў трынаццаць гадоў. Мужчына з’яўляецца перадавіком вытворчасці і прычынай гэтаму лічыць і той факт, што добра “даглядае” свайго жалезнага сябра.
Адметна, што старэйшы сын выбраў такі ж шлях у прафесіі як і бацька: юнак па мэтавым накіраванні атрымлівае ў Калінкавічах спецыяльнасць тэхніка-механіка. Тры гады запар хлопец задзейнічаны на ўборцы ўраджаю разам з бацькам і плануе прыехаць на малую радзіму на першае месца працы. Няма сумненняў, што і ў будучага аграрыя тэхніка будзе ўтрымлівацца належна. Калі доўгі час бачыць годны прыклад гаспадарлівасці, то дадзены вопыт абавязкова будзе пераняты. Малодшы сын яшчэ вучыцца ў мясцовай школы, але ёсць верагоднасць, што і ён будзе працягваць працоўную сямейную дынастыю.
Святлана СОБАЛЕВА, фота аўтара.
Оставить комментарий