У нядзелю, 26 студзеня, у нашай краіне адбудзецца галоўная палітычная падзея пяцігоддзя – выбары Прэзідэнта. Бягучы тыдзень праходзіць у Беларусі пад знакам датэрміновага галасавання. Завіталі на выбарчыя ўчасткі, каб пацікавіцца актыўнасцю землякоў і іх палітычнымі прыхільнасцямі.
Выбары для беларусаў – гэта не проста важны працэс і значная падзея, а і свядомае, узважанае рашэнне. Менавіта гэтым і тлумачыцца актыўнасць выбаршчыкаў, што прыпісаны да ўчастка для галасавання №1 у райцэнтры, ужо ў першы дзень датэрміновага галасавання. На момант адкрыцця ўчастка нават сабралася чарга з жадаючых датэрмінова аддаць голас у падтрымку свайго кандыдата на пасаду Прэзідэнта краіны.
На ўчастак для галасавання завіталі людзі рознага ўзросту. Эстафету электаральнай адказнасці і актыўнасці ў старэйшага пакалення пераймаюць і маладыя людзі, якія ў абедзены перапынак паспяшаліся скарыстацца сваім канстытуцыйным правам. На пытанне чаму галасуеце датэрмінова, у адказ чуем: “А чаго цягнуць, з выбарам вызначыліся, таму і прыйшлі на ўчастак у першы дзень яго работы”. Прыемна, што маладое пакаленне ўсведамляе сваю ролю ў вызначэнні будучыні краіны і прымае самы актыўны ўдзел у грамадска-палітычным жыцці.
Па агульным меркаванні землякоў, што прыйшлі на выбарчыя ўчасткі ў першы дзень датэрміновага галасавання, усе яны даволі выразна разумеюць, што прымаючы ўдзел у выбарах, не толькі праяўляюць уласную волю і грамадзянскую пазіцыю, але і бяруць на сябе адказнасць за будучыню краіны.
“З выбарам вызначыўся даўно, таму і галасую датэрмінова, – падзяліўся Жан Дубіна (на фота), трэнер-выкладчык па футболе ДЮСШ. – Да таго ж, у асноўны дзень галасавання я буду задзейнічаны ў правядзеннні спартыўна-масавых мерапрыемстваў на іншых участках, таму і прыйшоў прагаласаваць загадзя. Што да выбару, то я аддаю свой голас за кандыдата, якому ў поўнай меры давяраю і, дарэчы, ніколькі не сумняваюся ў правільнасці ўласнага выбару. Лічу, што Прэзідэнтам павінен стаць чалавек, аўтарытэт і вопыт якога будуць служыць умацаванню міру і дабрабыту. Я за тое, каб у нашай краіне ўсё было добра і жылі мы пад мірным небам”.
З падобным пасылам наведвалі выбарчыя ўчасткі ў час датэрміновага галасавання многія землякі. Яно і зразумела: толькі жывучы ў мірнай краіне, чалавек можа марыць і будаваць планы, быць спакойным за будучыню дзяцей і ўнукаў, годную сталасць сваіх бацькоў.
Так, наша агульная задача – захаваць тое, што мы сёння маем, і рухацца наперад да новых поспехаў і дасягненняў.
Нагадаем, што ў дні датэрміновага галасавання, з 21 па 25 студзеня, выбарчыя ўчасткі будуць працаваць традыцыйна з 12 да 19 гадзін без перапынку.
Упэўнены, што выбар, які робяць землякі гэтымі днямі, будзе правільны – за моцную і квітнеючую Беларусь. Час выбраў нас, і нам з вамі несці адказнасць перад нашчадкамі за будучыню краіны.
Галіна КАЗАК.
Оставить комментарий