5 жніўня прайшла 5 пазачарговая сесія раённага Савета дэпутатаў 29 склікання пад старшынствам старшыні раённага Савета дэпутатаў Віталія Пілера. У рабоце сесіі прыняў удзел старшыня Гомельскага абласнога выканаўчага камітэта Іван Крупко.
На парадак дня было вынесена пытанне “Аб зацвярджэнні на пасадзе старшыні раённага выканаўчага камітэта”. Нагадаем, кандыдатуру на гэту пасаду назначае старшыня аблвыканкама, затым узгадняе Прэзідэнт Рэспублікі Беларусь і зацвярджаюць на сесіі раённага Савета дэпутатаў.
Днямі на палетках СУП “Палессе-Аграінвест” Прэзідэнтам Рэспублікі Беларусь на пасаду старшыні Петрыкаўскага раённага выканаўчага камітэта ўзгоднены Аляксандр Верамееў.
У час прадстаўлення старшыні Петрыкаўскага райвыканкама Іван Крупко адзначыў, што задачы перад раёнам стаяць вельмі няпростыя. На сённяшні дзень галоўнае не страціць зямлю, таму неабходна стварыць годныя ўмовы працы на сельгаспрадпрыемствах. У планах да 2026 года ўсе існуючыя ў раёне сельгаспрадпрыемствы аб’яднаць у тры гаспадаркі.
Зрабіў акцэнт губернатар і на прыбытковай, без укладання бюджэтных сродкаў, працы ўсіх прадпрыемстваў раёна – гэта, па меркаванні кіраўніка вобласці, першачарговая задача. Спыніўся Іван Крупко і на развіцці сацыяльнай інфраструктуры, адзначыўшы, што ўсе пачатыя раней праекты будуць завершаны.
– Праекты, якія пачаліся з ААТ “Беларуськалій”, будуць працягвацца. Прэзідэнту даложана, што ўведзены ў эксплуатацыю акушэрска-гінекалагічны корпус, кабінет камп’ютарнай тамаграфіі, пабудаваны дзіцячы садок, у перспектыве з’явіцца фізкультурна-аздараўленчы комплекс і іншыя сацыяльныя аб’екты, – пазначыў старшыня Гомельскага аблвыканкама.
Губернатар вобласці выказаў упэўненасць у далейшым паступальным развіцці раёна.
– Аляксандр Аляксандравіч – вопытны кіраўнік і менеджар, здольны вырашаць шырокі спектр упраўленчых задач любой складанасці і надаць новы імпульс развіццю раёна, ураджэнцам якога ён з’яўляецца, – пазначыў Іван Крупко.
Выступаючы перад прысутнымі, Аляксандр Верамееў распавёў пра асноўныя вехі ўласнай біяграфіі:
– Нарадзіўся ў 1979 годзе ў вёсцы Мардзвін Петрыкаўскага раёна Гомельскай вобласці. У 1999 годзе закончыў Буда-Кашалёўскі аграрны каледж, у 2008 – Беларускую дзяржаўную сельскагаспадарчую акадэмію.
З 1999 па 2002 год працаваў загадчыкам гаража саўгаса “Прыпяцкі”, з 2002 па 2006 – галоўны інжынер КСУП “Петрыкаў”, з 2006 па 2008 – інжынер-механік ПСУП “Палессе-Аграінвест”. У перыяд з 2008 па 2010 – намеснік галоўнага інжынера па ахове працы ПСУП “Палессе-Аграінвест”, з 2010 па 2018 – намеснік дырэктара па матэрыяльна-тэхнічным забеспячэнні і маркетынгу СУП “Палессе-Аграінвест”. З 2018 па 2023 год – галоўны інжынер СУП “Палессе-Аграінвест”. З 2023 года займаў пасаду дырэктара СУП “Палессе-Аграінвест”. Дэпутаты райсавета адкрытым галасаваннем адзінагалосна падтрымалі кандыдатуру Аляксандра Верамеева, а старшыня аблвыканкама ўручыў новае службовае пасведчанне. Старшыня раённага Савета дэпутатаў Віталій Пілер ад імя ўсіх прысутных павіншаваў Аляксандра Аляксандравіча з зацверджаннем на пасадзе старшыні Петрыкаўскага райвыканкама, пажадаў поспехаў на гэтай нялёгкай і адказнай пасадзе, а таксама выказаў упэўненасць, што сумесная работа з дэпутатамі, кіраўнікамі, актывам паслужыць далейшаму развіццю Петрыкаўскага раёна.
Звяртаючыся да дэпутацкага корпуса і прысутных кіраўнікоў, губернатар адзначыў, што Петрыкаўшчына мае добрыя перспектывы, і ад эфектыўнай работы кожнага будзе залежаць агульны поспех. Граматна выкарыстоўваць рэзервы і рэсурсы – задача кіраўнікоў усіх узроўняў на месцах, – падкрэсліў Іван Крупко.
Старшыня Петрыкаўскага райвыканкама запэўніў, што яго праца будзе накіравана на развіццё раёна і рэгіёна ў цэлым, усе пастаўленыя задачы будуць выкананы.
Галіна КАЗАК. Фота аўтара.
Оставить комментарий