Квітней, мой родны Петрыкаў!
Добраўпарадкаванне на Петрыкаўшчыне працягваецца. Штотыднёвыя санітарныя дні агульнымі намаганнямі работнікаў райжылкамунгасу, жыхароў горада і населеных пунктаў раёна робяць малую радзіму ўтульнай і прывабнай.
Цешыць вока той факт, што з кожным годам у райцэнтры з’яўляюцца новыя куточкі з вечназялёнымі раслінамі. Яны надаюць райцэнтру сучасны і стыльны выгляд, да таго ж, што немалаважна, аднолькава прыгожа выглядаюць у любую пару года.
Аднак вясной і летам хочацца пабольш яркіх фарбаў, а іх на сённяшні дзень адназначна гораду не хапае. У той час як прыватныя сядзібы патанаюць у рознакаляровай прыгажосці, кветак на гарадскіх вуліцах мала. Істотным чынам у гэтым сэнсе вылучаецца хіба толькі цэнтр горада, дзе ўжо ва ўсю красуюць рознакаляровыя ружовыя кусты. Яшчэ пару тройку квітнеючых дагледжаных клумбаў заўважылі ў дварах шматпавярховак. У той час як клумбы, кветнікі і кашпо каля адміністрацыйных будынкаў і шэрагу прыватных крам, на жаль, усё яшчэ пустуюць. Ды і гарадскі парк сёлеты ў гэтым сэнсе выглядае сумна. Увогуле, недаравальна мала кветнікаў у райцэнтры – у адзін голас заўважаюць землякі.
Што тут яшчэ дадаць – усё так.
І гэта пры тым, што стварэнне прыгажосці не заўсёды звязана з выдаткоўваннем вялікіх матэрыяльных і чалавечых рэсурсаў. У большасці выпадкаў дастаткова неабыякавасці да месца, дзе жывеш, і справы, якой займаешся ў сілу прафесійных і службовых абавязкаў.
Вельмі хачацца, каб банер, якім вітаем гасцей на ўездзе ў райцэнтр, у поўнай меры адпавядаў нашай рэчаіснасці.
В. Мікалаева. Фота аўтара.
Оставить комментарий