Кожны год павінен заканчвацца прыгожа!

На базе раённага Дома культуры прайшоў святочны канцэрт “У рытме Новага года”.

Навагоднія святы набліжаюцца, а гэта значыць, што па ўсёй краіне арганізоўваюцца ўрачыстыя мерапрыемствы, ладзяцца канцэрты.
Педагогі і навучэнцы Петрыкаўскай дзіцячай школы мастацтваў напярэдадні свят змаглі падараваць землякам не толькі магчымасць добра правесці час, але і паднялі настрой, прымусілі яшчэ мацней чакаць надыходу Каляд і Новага года.
Маленькія артысты сцэны не саромеліся і з запалам выконвалі песні і танцы, а падтрымлівалі іх выкладчыкі і, безумоўна, прысутныя, сярод якіх знаходзіліся бацькі, бабулі і дзядулі, сябры.
Ігра на музычных інструментах: фартэпіяана, цымбалах, скрыпцы не пакінула без эмоцый ніводнага гледача. Чароўная музыка напоўніла залу прыемнай атмасферай.
Гледачы – людзі рознага ўзросту: ад маленькіх дзетак да людзей паважанага ўзросту, але калі прыйшоў час гучна клікаць галоўнага госця мерапрыемства – Дзеда Мароза, усе без выключэння прымалі ўдзел у важнай місіі. І гэта яшчэ раз пацвярджае, што любы чалавек хоча хоць на хвіліну зведаць сапраўдны цуд і акунуцца ў атмасферу свята. З задавальненнем разгадвалі дзеці і дарослыя загадкі на навагоднюю тэматыку, а самыя актыўныя ўдзельнікі атрымалі салодкія падарункі ад Дзеда Мароза.
Новы год – свята цудаў і незабыўных эмоцый, а яшчэ гэта час, калі можна загадаць самыя запаветныя жаданні і яны абавязкова спраўдзяцца.

Анастасія КІСЕЛЕВА.
Фота аўтара.