У чацвер, 5 снежня, у канферэнц-зале Музея прыроды Нацыянальнага парка “Прыпяцкі”, што ў аграгарадку Ляскавічы, прайшоў маладзёжны форум “Час абраў нас”, на які былі запрошаныя маладыя работнікі галіны аховы здароўя Гомельшчыны. У якасці арганізатараў форуму выступіла абласная арганізацыя Беларускага прафесійнага саюза работнікаў аховы здароўя.
Пасля прывітальнага відэазвароту начальніка галоўнага ўпраўлення па ахове здароўя аблвыканкама Сяргея Белага, спікеры форуму выступілі з тэзісамі і прапанавалі маладым медыкам да абмеркавання шэраг пытанняў.
Так, старшыня абласной арганізацыі Беларускага прафсаюза работнікаў аховы здароўя Надзея Зіміна распавяла пра асаблівасці выбараў 2025 года і іх значнасць для кожнага беларуса. Член Савета Рэспублікі Нацыянальнага Сходу Беларусі Людміла Сапега засяродзіла ўвагу на новаўвядзеннях выбарчага заканадаўства і іх уплыў на працэс галасавання. “Істотную ролю ў палітычным жыцці зараз адыграе Усебеларускі народны сход, члены якога вылучаюцца як ад грамадства, так і ад дэпутацкага корпуса. Гэта павінна актывізаваць работу грамадскіх аб’яднанняў і палітычных партый і, канешне, абумовіць непасрэдны ўдзел у палітычным жыцці краіны самых годных, ініцыятыўных, адказных і кемлівых беларусаў”, – заўважыла Людміла Анатольеўна.
Старшыні Петрыкаўскага і Жыткавіцкага раённых Саветаў дэпутатаў Віталь Пілер і Леанід Валатоўскі расказалі, як органы раённай заканадаўчай улады дапамагаюць новым выбаршчыкам разабрацца ў выбарчым працэсе і ўсвядоміць значнасць удзелу ў выбарах.
Галоўны ўрач Петрыкаўскай ЦРБ Яўгеній Логвінец засяродзіў увагу прысутных на пытанні ўсведамлення значнасці кожнага голасу на выбарах і ўплыву на меркаванні тых, хто лічыць удзел у выбарах фармальнасцю.
Моладзь задавала спікерам свае пытанні – удзельнікаў форуму цікавіла, якія грамадзянскія ініцыятывы найбольш эфектыўныя для фарміравання актыўнай грамадзянскай пазіцыі, ацэнка ўцягнутасці моладзі ў выбарчы працэс, як змяняецца работа Нацыянальнага Сходу Беларусі ў час набліжэння важнай палітычнай падзеі ў жыцці краіны.
Арцём ГУСЕЎ.
Фота аўтара.
Оставить комментарий