Беларускі рэспубліканскі саюз моладзі сёння адзначае 21 дзень нараджэння. Гэта найбуйнейшая маладзёжная арганізацыя краіны, якая за гады працы даказала сваю самастойнасць і ў вялікай інфармацыйнай прасторы служыць для моладзі маральна-духоўным арыенцірам.
Па словах першага сакратара Петрыкаўскай раённай арганізацыі грамадскага аб’яднання “БРСМ” Дар’і Туравец, у Дзень нараджэння прынята падводзіць вынікі сваёй дзейнасці.
– Усе мы актыўна прымаем удзел у розных культурна-масавых мерапрыемствах, дабрачынных акцыях і праектах. І зараз нам ёсць пра што расказаць і чым ганарыцца. Мы дапамагалі ветэранам, наводзілі парадак на помніках воінам і ахвярам вайны, удзельнічалі ў шматлікіх ваенна-патрыятычных мерапрыемствах, апошнім разам адлічбавалі знакавыя гістарычныя аб’екты наша горада. Асабліва мне важна, каб кожнае меркаванне, ідэя, пажаданне члена БРСМ было пачута. Мы адкрытыя да прапаноў і ініцыятыў. Радуе, што з кожным годам у нашых шэрагах з’яўляецца больш актыўных хлопцаў і дзяўчынак, якія рухаюць жыццё наперад. Практычна ў кожнага маладога чалавека ёсць свае захапленні: спорт, мастацтва, валанцёрская і навуковая дзейнасць.
Праводзяцца сустрэчы з вучнямі і маладымі педагогамі. Гутаркі закранаюць практычна ўсе надзённыя праблемы моладзі: арганізацыя вольнага часу, другасная занятасць, жыллё. Ва ўсіх школах раёна і ў многіх арганізацыях створаны і працуюць першасныя арганізацыі ГА “БРСМ”. Колькасць раённай арганізацыі БРСМ сёлета складае 804 чалавекі.
Самае галоўнае, пра гэта яшчэ казаў Прэзідэнт, у аснове краіны павінна стаяць добра развітая эканоміка. І мы зрабілі на гэтым акцэнт у летні перыяд, дапамагаючы з працаўладкаваннем у маладзёжныя атрады. У выніку 128 чалавек з нашага раёна змаглі зарабіць сёлета ў студэнцкіх атрадах. Дарэчы, такіх у нас было створана 12. Хтосьці з нашых удзельнікаў упершыню змог працаўладкавацца, хтосьці ўжо прыйшоў не ў першы раз. Наша задача – зрабіць так, каб кожны малады чалавек прыносіў карысць краіне, – агучыла Дар’я Сяргееўна.
Мы спыталі ў рабят, якія актыўна прымаюць удзел у рэалізацыі праектаў БРСМ, што для із значыць маладзёжная арганізацыя, і якія ініцыятывы яны жадаюць рэалізаваць у будучым.
Лілія КІЛБАС, вучаніца гімназіі:
– У БРСМ я ўступіла ў 14 гадоў. З таго часу маё жыццё змянілася. Прыемна, што раскрываць свой патэнцыял можна ў самых розных кірунках, кожны чалавек мае магчымасць быць пачутым, абмеркаваць пытанні, якія цікавяць, знайсці новых сяброў. На працягу двух гадоў актыўна займаюся валанцёрствам, удзельнічаю ў штогадовай дабрачыннай акцыі “Цуды на Каляды”, працоўных акцыях “ЗаДело”. З добрым вынікам напісала “Дыктоўку Перамогі” і ўдзельнічала ў “Маладзёжным квізе”. Праяўляючы ініцыятыву ў розных праектах, можна набыць карысны досвед.
Для мяне Саюз моладзі – гэта частка мяне. Лічу, што гэта цудоўная аснова і падтрымка для моладзі.
Што да далейшага развіцця БРСМ, я лічу, што цяпер у прыярытэце павінны быць жывыя зносіны і варта арганізоўваць экскурсіі ў цікавыя мясціны Беларусі, бо назіранне за цудамі прыроды, архітэктурнымі шэдэўрамі або гістарычнымі славутасцямі нашай краіны можа выклікаць пачуццё глыбокага захаплення і любові да сваёй Радзімы.
Мікіта ЧЫРЫЧ, вучань сярэдняй школы № 2:
– Пасля таго, як уступіў у маладзёжную арганізацыю, атрымаў мноства прывілеяў, адзін з іх – працаўладкаванне ў студэнцкі атрад.
Я прымаў удзел у шматлікіх акцыях. Самая запамінальная – “Праспяваем гімн разам” на 9 мая. Мы з хлопцамі арганізавалі свайго роду флэшмоб, я спяваў адну з вядомых песень “Гэта Беларусь мая”, а яны арганізавалі сапраўднае шоу, у тым ліку з дзяржаўнымі сімваламі нашай краіны. Гледачы, ведаючы тэкст, падвялі мне. Гэта быў цікавы досвед. Мне падабаецца быць у цэнтры падзей.
Я веру, саюз моладзі будзе прывабліваць яшчэ больш таленавітай моладзі, а ўжо разам мы разнастаім жыццё горада і раёна.
Анастасія СОБАЛЕВА, вучаніца сярэдняй школы № 1:
– Неяк праходзячы па калідоры школы, убачыла на стэндзе аб’яву пра працаўладкаванне моладзі ад БРСМ. Вырашыла напісаць заяву. Праз некаторы час мне патэлефанавала Дар’я Сяргееўна. Яна папрасіла падрыхтаваць дакументы. Мы, атрад з 10 чалавек, і наш куратар Юлія Ігараўна пачалі работу ў гадавальніку лясгасу. Там мы займаліся праполкай саджанцаў. Адпрацавалі 10 дзён. Атмасфера была спрыяльнай. Усе вучні ў атрадзе былі добразычлівымі. Мне вельмі спадабалася. Дзякуючы БРСМ я набыла новых сяброў. Калі мне прапануюць яшчэ прыняць удзел у такім праекце, абавязкова пагаджуся.
Асабліва мне падабаецца валанцёрская дзейнасць, лічу, што гэты напрамак патрэба больш пашыраць.
Наталля ПЕТРУШЭНКА.
Оставить комментарий