У пачатку лістапада ў Гомелі прайшоў XIV абласны форум лідараў дзіцячага і маладзёжнага руху “Лідары XXI стагоддзя: новы фармат”. Юнакі і дзяўчаты з кожнага раёна вобласці прыехалі, каб пазнаёміцца з цікавымі людзьмі, атрымаць важную інфармацыю, якая спатрэбіцца ў далейшай грамадскай дзейнасці і, вядома ж, весела і карысна правесці час. Прадстаўнікамі Петрыкаўскага раёна сталі старшыня раённага Савета Старшакласнікаў Лізавета Рудаўская і член сектара СМІ Ганна Пінчук.
У першы дзень мерапрыемства адбылося ўрачыстае адкрыццё форуму, а пасля пачалася праца ў актыўным рытме. Часу сумаваць не было. Рабяты знаёміліся, удзельнічалі ў інтэрактыўных гульнях, стваралі і распрацоўвалі праекты, прымалі ўдзел у лекцыі, прысвечанай гандлю людзьмі. У канцы насычанага дня ўдзельнікі адправіліся на дыскатэку.
Другі дзень форуму пачаўся з наведвання мемарыялу “Помнік дзецям – ахвярам Вялікай Айчыннай вайны” ў Чырвоным Беразе, падчас якога былі арганізаваны экскурсія, мітынг, ускладанне кветак. Вярнуўшыся ў абласны цэнтр, мы зноў прыняліся старанна працаваць над сваімі праектамі. Што адрознівае звычайнага чалавека ад лідара? Лідар валодае цягавітасцю, харызмай, кіраўнічымі якасцямі і, вядома ж, высокім інтэлектам. Завяршаўся дзень інтэлектуальным квізам “Пад знакам якасці”, у час якога старшакласнікі змагаліся за званне лепшай каманды.
У трэці, заключны дзень таксама ніхто не сумаваў. Праекты, даробленыя вялікай камандай, нарэшце былі прадстаўлены на дыялогавай пляцоўцы “Моладзь: будучыня ў адзінстве”. Запамінальна прайшло ўрачыстае закрыццё і надышоў той момант, які ўсе спрабавалі аддаліць – час развітвацца. Сумкі ўжо чакалі ў холе, юнакі і дзяўчаты абдымаліся, фатаграфаваліся, дзякавалі адзін аднаму за карысна праведзены час. Тры дні праляцелі незаўважна, быццам некалькі гадзін.
«Лідары XXI стагоддзя: новы фармат” – гэта магчымасць паказаць сябе, даведацца нешта новае і знайсці сяброў на тэрыторыі ўсёй вобласці!
Ганна ПІНЧУК, сектар СМІ раённага Савета старшакласнікаў.
Оставить комментарий