Сёння гарадская гімназія стала пляцоўкай правядзення важнага і хвалюючага мерапрыемства – тут прайшоў раённы Дзень прызыўніка.
Ва ўрачыстай абстаноўцы павесткі для праходжання тэрміновай вайсковай службы былі ўручаны 35 землякам прызыўнога ўзросту. Так, зусім хутка для маладых людзей пачнецца новы, адказны этап жыцця: служба ва Узброеных Сілах Рэспублікі Беларусь.
Раздзяліць гэты момант з будучымі абаронцамі Айчыны прыйшлі ганаровыя госці.
Са словамі падтрымкі да будучых вайскоўцаў звярнулася намеснік старшыні райвыканкама, старшыня раённай прызыўной камісіі Наталля Ходзька. Як куратар гэтага напрамку, яна падкрэсліла важнасць пераемнасці пакаленняў і вернасці традыцыям роднага краю.
З вайсковым наказам выступіў і ваенны камісар раёна Захар Смірноў, які нагадаў, што абарона Айчыны – гэта не толькі ганаровы абавязак, але і школа жыцця, якая гартуе характар. Духоўную падтрымку прызыўнікам аказаў протаіерэй Свята-Мікалаеўскага храма Васілій Немеш. Айцец Васілій згадаў сваю вайскову службу і пажадаў прызыўнікам не падаць духам, праяўляць мудрасць і стойкасць у пераадоленні вайсковых выпрабаванняў. Мудрыя парады даў старшыня раённага Савета ветэранаў Уладзімір Жукавец, чалавек, чый лёс з’яўляецца яркім прыкладам сапраўднага патрыятызму:
– Няхай вашы навыкі адточваюцца толькі на навучальных палігонах, а служба праходзіць пад спакойным і ясным небам Беларусі.
Маладзёжны лідар Петрыкаўшчыны Дар’я Герасіменка пажадала маладым людзям знайсці надзейных сяброў, з якімі яны змогуць падзяліць усе нягоды і радасці службы:
Вы – нашчадкі пакалення пераможцаў, якое прымае эстафету абароны Айчыны ад нашых дзядоў і прадзедаў. Служыце годна, беражыце гонар свайго раёна і памятайце: час выбраў нас!
У гэты дзень у адрас прызыўнікоў гучала шмат добрых слоў. Галоўны пасыл усіх выступленняў быў адзіны: несці службу годна, з гонарам выканаць свой воінскі абавязак і памятаць, што на малой радзіме іх вельмі чакаюць.
Адмысловую атмасферу свята стварылі навучэнцы гімназіі. Падрыхтаваны імі шыкоўны канцэрт не пакінуў нікога абыякавым: творчыя нумары былі прасякнуты любоўю да Радзімы і гонарам за сваіх землякоў.
У добры шлях, прызыўнік!
Галіна КАЗАК.
Фота аўтара.
Оставить комментарий