Напярэдадні новага навучальнага года ў нашым горадзе прайшла прыемная сустрэча. Маленькая жыхарка гарадскога пасёлка Капаткевічы Маргарыта Раманко разам з мамай завітала ў райцэнтр, каб атрымаць свой першы школьны падарунак. Марыя Пінчук, мама дзяўчынкі, працуе начальнікам участка Петрыкаўскага ПМС. Сёлета ў яе сям’і асаблівая падзея: Маргарыта рыхтуецца ўпершыню пераступіць парог Капаткевіцкай сярэдняй школы.
Для Марыі Леанідаўны дачушка – доўгачаканае дзіця, бо двое старэйшых дзяцей – сыны. Падтрымаць будучую вучаніцу і падарыць ёй святочны настрой вырашылі ў прафсаюзнай арганізацыі. Старшыня Петрыкаўскай раённай арганізацыі Беларускага прафесійнага саюза работнікаў аграпрамысловага комплексу Алена Галеня ўручыла Маргарыце новенькі партфель з усімі неабходнымі школьнымі прыналежнасцямі. Алена Фёдараўна павіншавала дзяўчынку з надыходзячым Днём ведаў і пажадала ёй поспехаў у вучобе, стараннасці і цікавых адкрыццяў. 
Марыя Леанідаўна шчыра падзякавала прафсаюзнаму лідару за ўвагу і клопат, якія вельмі важныя для бацькоў напярэдадні такога адказнага этапу ў жыцці дзіцяці. Сама ж Маргарыта, не хаваючы радасці, з вялікай цікавасцю разглядала змесціва свайго першага партфеля. Яркія сшыткі, алоўкі і іншыя школьныя прылады выклікалі ў дзяўчынкі сапраўдны захапленне. Цяпер яна цалкам гатовая да таго, каб 1 верасня ўпэўнена ўвайсці ў клас і пачаць свой шлях у краіну ведаў.
Оставить комментарий