Напярэдадні Дня работнікаў культуры мы завіталі ў філіял “Ляскавіцкі цэнтр культуры і вольнага часу”, каб бліжэй пазнаёміцца з вакальным ансамблем “Суседзі”.
Гэтыя яркія і таленавітыя артысты паспелі заваяваць шчырую любоў і прызнанне землякоў.
Чаму ж такая назва?
Адказ просты і вельмі сімвалічны. У калектыве спяваюць работнікі і проста аматары мастацтва з Ляскавіч і Галубіцы. Удзельнікі не проста тэрытарыяльныя суседзі – яны сапраўдныя сябры, якія разам праводзяць канцэрты і мерапрыемствы. І ў Ляскавіцкім цэнтры культуры, і ў Галубіцкім сельскім доме культуры, на пляцоўках Петрыкаўшчыны – усюды гучаць іх песні.
Жанчына – захавальніца традыцый
Здаўна ў беларускай культуры менавіта жанчына была і застаецца галоўнай захавальніцай народных традыцый, песень і звычаяў. Яна перадае гэтую спадчыну сваім дзецям і ўнукам, дорыць ёй новае жыццё на сцэне і ў штодзённасці. Гэта яскрава даказваюць удзельнікі ансамблю: тут спяваюць дзевяць цудоўных жанчын, кожная з якіх не толькі захоўвае традыцыі роднага краю, але і напаўняе іх сваім цяплом, любоўю і жыццёвай мудрасцю: Святлана Жукавец, Алена Петравец, Вера Андрук, Нэлі Трухановіч, Людміла Глазунова, Тамара Барысава, Лізавета Міцкевіч, Надзея Левада і Ніна Купрацэвіч. Многія з удзельніц аддалі творчасці большую частку свайго жыцця. Рэпертуар ансамбля радуе сваёй разнастайнасцю і багаццем. Тут гучаць беларускія і рускія народныя песні, але жанчыны ўключаюць у свае выступленні і эстрадныя кампазіцыі ў сучасных апрацоўках.
– Мы стараемся падабраць такі рэпертуар, каб кожны знайшоў у ім нешта сваё, – расказвае кіраўнік ансамбля Людміла Глазунова. – Хочацца, каб наша песня сагравала, падбадзёрвала, вяртала ў маладосць. Мы спяваем душой.
Песня – гэта жыццё
Нягледзячы на тое, што ансамбль “Суседзі” адносна малады, практычна ні адно мерапрыемства на Петрыкаўшчыне не абыходзіцца без іх удзелу. Творчы калектыў – пастаянныя ўдзельнікі святаў, канцэртаў і ўрачыстасцей. І гэта не дзіўна, бо іх задорныя песні, яркія нумары і шчырыя ўсмешкі даўно сталі неад’емнай часткай культурнага жыцця раёна.
У гэтым годзе калектыву выпаў гонар выступіць на абласным фестывалі-кірмашы працаўнікоў сяла “Дажынкі-2026” у Калінкавічах. Гэта высокая адзнака таленту і працаздольнасці калектыву. Выступіць на такой вялікай сцэне – вялікі гонар і незабыўныя эмоцыі.
Жадаем калектыву новых творчых перамог, яркіх выступленняў і невычэрпнага натхнення!
Марыя Тамко, фота аўтара.
