З 17 па 24 кастрычніка на Петрыкаўшчыне пройдзе добраахвотная грамадская акцыя “Дай лесу новае жыццё”, ініцыяваная Міністэрствам лясной гаспадаркі Рэспублікі Беларусь.
Галоўная мэта гэтай восеньскай кампаніі, як пазначыў нашаму карэспандэнту дырэктар ДЛГУ “Петрыкаўскі лясгас” Іван Торчык, – аб’яднаць намаганні землякоў, каб аднавіць зялёнае багацце раёна і пасадзіць новыя лясныя культуры на плошчы больш за 14 гектараў.
Лесаводы запрашаюць кожнага жыхара раёна зрабіць свой асабісты ўнёсак у будучыню роднай зямлі.
Без перабольшання, лес – гэта сапраўднае сэрца і галоўны скарб нашага раёна. Цяжка ўявіць Петрыкаўшчыну без яе велічных бароў і гасцінных дубраў, бо больш за 56% тэрыторыі раёна занята лясамі. Гэта наш гонар, наша чыстае паветра і спадчына, якую мы атрымалі ад продкаў і абавязаны захаваць для наступных пакаленняў.
Пагадзіцеся, сапраўдная любоў да роднага краю вымяраецца менавіта сумесным клопатам пра яго, і акцыя “Дай лесу новае жыццё” – выдатная магчымасць даказаць гэта на справе.
Каб маштабныя планы па аднаўленні лясоў ператварыліся ў жыццё, Петрыкаўскі лясгас шчыра запрашае да ўдзелу грамадскія арганізацыі, працоўныя калектывы, дружныя сем’і, школьнікаў, моладзь і ўсіх неабыякавых жыхароў раёна. Хвалявацца за тэхнічны бок справы добраахвотнікам не прыйдзецца: мясцовыя лесаводы цалкам забяспечаць кожнага ўдзельніка неабходным пасадачным інвентаром і якаснымі саджанцамі.
Каб стаць часткай гэтай вялікай і добрай справы, неабходна загадзя звярнуцца ў лясгас па тэлефонах: 2-90-17 (аддзел лясной гаспадаркі) альбо 2-36-26 (намеснік дырэктара па ідэалагічнай рабоце Яўгеній Уладзіміравіч Міцкевіч). Таксама заяўку на ўдзел можна пакінуць у бліжэйшым да вас лясніцтве раёна.
Адкладзіце на час будзённыя клопаты і падарыце некалькі гадзін роднай прыродзе. Адновім лясы Петрыкаўшчыны разам, бо кожнае пасаджанае нашымі рукамі дрэва – гэта жывы след на зямлі і найлепшы дарунак нашым нашчадкам.
Галіна КАЗАК.
Фота аўтара.
