Брынёўская сярэдняя школа – яскравы доказ таму, што і ў малакамплектных установах адукацыі жыццё навучэнцаў можа быць запамінальным і цікавым.
На днях на тэрыторыі школы да радасці дзятвы і дарослых з’явілася пляцоўка з сучаснымі трэнажорамі. Згадзіцеся – падзея адметная для невялікага населенага пункта.
Дырэктар школы Алена Сасноўская прызнаецца: каб увасобіць задуманае ў жыццё, зроблена вялікая і карпатлівая праца.
– Ідэя набыць трэнажоры ў калектыву школы ўзнікла два гады таму. Здаровы лад жыцця – важны і адзін з асноўных напрамкаў для педагогаў у выхаванні падрастаючага пакалення. Бачылі мы і жаданне, матывацыю дзяцей займацца спортам: у суботні дзень, канікулярны перыяд, па вечарах спартыўная зала заўсёды запатрабаваная як вучнямі, так і працоўнай моладдзю. Пры жаданні займацца на сучасным спартыўным абсталяванні вучням патрэбна было дабірацца да райцэнтра, дзе трэнажоры ўсталяваны ў фізкультурна-аздараўленчым комплексе, дзіцяча-юнацкай спартыўнай школе. А ад Брынёва да Петрыкава – адлегласць не малая. Вось і вырашылі паспрабаваць сваімі сіламі, – дзеліцца Алена Іванаўна.
У пачатку бягучага года пачалася актыўная работа па дасягненні пастаўленай мэты. На прапанову адгукнуліся бацькі, многія выпускнікі школы. Не засталіся ў баку мясцовая ўлада, падшэфныя арганізацыі, насельніцтва Брынёва.
Недарма кажуць: добрыя справы – прыкметныя здалёк. На дапамогу прыйшлі людзі, якія ацанілі старанні брынёўцаў і дабрачыннасць стала для землякоў нагодай унесці свой уклад у добрыя намеры.
Пляцоўку для трэнажораў вырашылі ўладкаваць на месцы зносу былога памяшкання школы. Работа па добраўпарадкаванні пустуючага месца актыўна вя-дзецца работнікамі ўстановы. У гэтым месяцы ў рамках Тыдня бацькоўскай любові была высаджана “Сямейная алея” з туй. І вось пасля ўсеагульных намаганняў педагогі і вучні сустракалі сем прыгожых, новых трэнажораў. Да дня дастаўкі грузу калектыў школы сваімі сіламі падрыхтаваў пляцоўку для абсталявання: зрабілі навес і адпаведную дарожную аснову.
Сёння пяцьдзясят навучэнцаў Брынёўскай школы маюць магчымасць штодня займацца спортам, бо для іх ён – норма жыцця. Чакаюць вучні да сябе і гасцей з другіх устаноў адукацыі, каб разам паспаборнічаць у сіле і майстэрстве.
Святлана СОБАЛЕВА,
фота з архіву Брынёўскай сярэдняй школы.
Оставить комментарий