Тэма выплаты заработнай платы з парушэннем заканадаўства, без яе адлюстравання ў бухгалтарскім уліку ў так званым “канверце”, знаходзіцца на асобым кантролі ў дзяржаўных органаў. Яно і зразумела: гэтае рэзананснае пытанне мае значэнне не толькі для эканомікі дзяржавы, але і для кожнага працуючага грамадзяніна, які атрымлівае зарплату такім чынам.
Днямі мы звярнуліся да начальніка Петрыкаўскага раённага аддзела Гомельскага абласнога ўпраўлення Фонду сацыяльнай абароны насельніцтва Святланы АНАНЬЕВАЙ, каб акрэсліць і папярэдзіць негатыўныя наступствы выплаты і атрымання заработнай платы “ў канвертах”.
Прэзідэнт Рэспублікі Беларусь Аляксандр Лукашэнка, выступаючы з дакладам на VI Усебеларускім народным сходзе, жорстка папярэдзіў бізнесменаў аб недапушчальнасці выплат зарплат у канвертах. Ён падкрэсліў згубныя наступствы такіх выплат для эканомікі краіны ў цэлым і негатыўны ўплыў на тых, хто працуе сумленна, выплачваючы ўсе падаткі і выплаты ў сацыяльныя фонды, – акрэсліла суразмоўца пазіцыю Кіраўніка краіны па гэтым пытанні.
Не сакрэт, што галоўная мэта выплаты заработнай платы без адлюстравання яе ў бухгалтарскім уліку для нядобрасумленнага працадаўцы – магчымасць мінімізаваць выдаткі на выплату падаткаў, пошлін, абавязковых страхавых узносаў і іншых плацяжоў, а таксама не выконваць нормы працоўнага заканадаўства.
Як пазначыла ў працяг гаворкі Святлана Ананьева, працуючы грамадзянін, без афіцыйнага афармлення працоўных або грамадзянска-прававых адносін, трапляе ў зону сацыяльнай рызыкі, губляе права, у першую чаргу, на суму абяцанага заробку, на гарантаваныя дзяржавай выплаты ў сувязі з часовай непрацаздольнасцю, а таксама на страхавы пенсійны стаж.
– Асноўнай крыніцай выплат працоўных пенсій і дапамог па часовай непрацаздольнасці з’яўляюцца абавязковыя страхавыя ўзносы, якія выплачваюцца работадаўцамі за кожнага работніка ў бюджэт Фонду сацыяльнай абароны насельніцтва. У залежнасці ад выплаты абавязковых страхавых узносаў набываецца права працуючых грамадзян на выплаты па дзяржаўным сацыяльным страхаванні на выпадкі хваробы, часовай непрацаздольнасці, цяжарнасці і родаў, інваліднасці, дасягненні пенсійнага ўзросту, страты карміцеля, смерці застрахаванай асобы або члена яе сям’і.
Згодна з заканадаўствам аб пенсійным забеспячэнні ў 2024 годзе права на працоўную пенсію па ўзросту, за выслугу гадоў маюць асобы, у якіх мінімальны страхавы стаж складае 19,5 гадоў. У страхавы стаж залічваюцца толькі тыя перыяды работы, прадпрымальніцкай, творчай і іншай дзейнасці, за якія праводзілася выплата абавязковых страхавых узносаў у бюджэт фонду. Штогод страхавы стаж павялічваецца на паўгода да дасягнення да 2025 года 20-ці гадоў, – паведаміла начальніка Петрыкаўскага раённага аддзела Гомельскага абласнога ўпраўлення Фонду сацыяльнай абароны.
Як вядома, абавязак пералічваць за працуючых грамадзян абавязковыя страхавыя ўзносы ў бюджэт фонду сацыяльнай абароны насельніцтва поўнасцю ляжыць на наймальніку.
Пры гэтым важна памятаць, што за ўхіленне ад налічэння і выплаты абавязковых страхавых узносаў з 19 чэрвеня 2021 года артыкулам 243-3 Крымінальнага кодэкса Рэспублікі Беларусь уведзена крымінальная адказнасць наймальнікаў, якая прадугледжана за даказаныя наўмысныя дзеянні, звязаныя з нявыплатай абавязковых страхавых узносаў у бюджэт фонду, пры ўмове, што сума не здзейсненых плацяжоў перавышае буйны памер – 2,5 тысячы базавых велічынь.
Нягледзячы на праводзімую дзяржаўнымі органамі актыўную працу па прадухіленні выплат заработнай платы “ў канвертах”, клапаціцца аб уласным страхавым стажы трэба кожнаму грамадзяніну.
Суразмоўца нагадала, што ў органах Фонду сацыяльнай абароны насельніцтва ёсць прадстаўленая з 2003 года працадаўцамі інфармацыя аб сумах налічанай работнікам заработнай платы і выплачаных абавязковых страхавых узносах, якую кожны грамадзянін можа запытаць у адносінах да сябе.
Такім чынам, атрымаць інфармацыю аб перыядах выплаты страхавых узносаў і сумах выплат, з якіх яны выплачаны і пераканацца ў яе дакладнасці можна, звярнуўшыся ў любы раённы аддзел Фонду па звесткі з індывідуальнага асабовага рахунку асабіста або пісьмова, і атрымаць яе бясплатна ў органах Фонду (https://ssf.gov.by/ru/contacts-ru/).
– Звяртаю ўвагу, што пры асабістым звароце неабходна прад’явіць пасведчанне сацыяльнага страхавання і дакумент, які сведчыць асобу, пісьмова – накіраваўшы запоўненую заяву ўстаноўленай формы.
Таксама атрымаць указаную інфармацыю можна, скарыстаўшыся мабільным дадаткам “ФСАН”, які неабходна спампаваць на сваю мабільную прыладу (на адной з платформ Google Play, APP Store, AppGallery), уваход у дадатак – па лагіне і паролі, атрыманым пасля рэгістрацыі і праходжання аўтэнтыфікацыі у Міжбанкаўскай сістэме ідэнтыфікацыі, – паведаміла Святлана Ананьева.
Падрабязная інфармацыя з відэаінструкцыямі размешчана на сайце Фонду сацыяльнай абароны насельніцтва ў раздзеле “Мабільны дадатак” (адрас сайта: ssf.gov.by).
Галіна КАЗАК. Фота аўтара.
Оставить комментарий