Сёння прафесійнае свята адзначаюць энергетыкі. Немагчыма ацаніць маштабы і значнасць працы, якую штодзённа выконваюць прадстаўнікі гэтай унікальнай галіны.
На Петрыкаўшчыне за дадзены напрамак адказвае Петрыкаўскі РЭС, ад працы работнікаў якога напрамую залежыць бесперабойная работа прадпрыемстваў, арганізацый, устаноў раёна, цяпло і ўтульнасць нашых дамоў. У ліку лепшых работнікаў арганізацыі – майстар размеркавальных сетак Сяргей Голуб.
Як адносіцца Сяргей Аляксеевіч да абранай прафесіі, красамоўна гаворыць адзін факт: дваццаць восем гадоў таму ён прыйшоў у мясцовы РЭС на сваё першае працоўнае месца і з таго часу не змяніў свайму прызванню, па яго словах – нават у думках. Наш герой, ураджэнец Петрыкава, у свой час закончыў другую гарадскую школу і паступіў у Буда-Кашалёўскі аграрна-тэхнічны каледж на факультэт “Аўтаматызацыя і электрыфікацыя сельскай гаспадаркі”.
– Са школьных часоў марыў звязаць сваё жыццё з электрычнасцю. Ведаў, што ў гэтую прафесію выпадковыя людзі не прыходзяць, бо занадта высокая планка патрабаванняў. Але вырашыў не адступаць ад сваіх планаў і з асаблівай адказнасцю вывучаў фізіку, – успамінае герой. – Пасля атрымання сярэднеспецыяльнай адукацыі, адслужыў у войску і прыйшоў на працу ў мясцовыя электрасеткі. Вучоба ў тэхнікуме мне дала трывалыя веды, але шмат прыйшлося спасцігаць на месцы.
За прафесійны шлях Сяргей Аляксеевіч з пасады манцёра “дарос” да майстра. Зараз яго асноўны абавязак – забеспячэнне насельніцтва бесперапыннай падачай электраэнергіі. Мужчына адзначае, што любіць справу, якой займаецца і не шкадуе пра свой выбар. Тым больш, што створаны ўсе ўмовы для камфортнай працы, калектыў энергетыкаў адказны і разумеючы.
– Прафесія энергетыка – запатрабаваная, аднак лічыцца і адной з самых небяспечных, бо кожны працоўны дзень работнікі галіны сутыкаюцца з пэўнай рызыкай. Тыя, хто прыйшоў і застаўся ў РЭСе, людзі адказныя і моцныя духам, бо дні і ночы, у будні і святы, пры любых умовах надвор’я трэба быць гатовым аператыўна і якасна ліквідаваць наступствы аварыйных сітуацый, – дзеліцца суразмоўца. – Гэты год не быў просты для нас. Ліпень прынёс Гомельшчыне нечаканыя сюрпрызы з непрыемнымі наступствамі: моцны шквалісты вецер, паваленыя дрэвы пашкодзілі вялікую колькасць ліній электраперадач. У такой няштатнай сітуацыі энергетыкі Петрыкаўшчыны спрацавалі зладжана і аператыўна.
Майстар адзначыў, што для забеспячэння надзейнасці энергетычнай гаспадаркі праводзіцца пастаянная работа. З апошніх: рэканструявана лінія ў вёсцы Смятанічы, праведзены работы ў Турку, на сённяшні дзень электрыкі шчыруюць каля вёскі Акрыёны. Не абыходзяць энергетыкі і лясныя масівы, цяжка праходныя ўчасткі. Кіраўнік дзяржавы паставіў перад работнікамі задачу – правесці рэвізію ўсіх электрасетак. У выпадку выяўлення найменшых фактараў, якія выклікаюць насцярожанасць, старыя сеткі неабходна дэмантаваць і замяніць.
Час не стаіць на месцы і патрабуе новых навыкаў. Усё больш жыхароў разглядваюць прапановы па ўсталяванні электракатлоў, электраацяплення. Але цяжкасцей спецыялісты РЭС не баяцца і пастаянна працуюць над павышэннем якасці атрымліваемай электрычнай энергіі.
На рабоце наш герой – добры спецыяліст, які годна выконвае свае абавязкі, надзейны таварыш, а дома – шчаслівы бацька дзвюх дачок і любячы муж. “Шчаслівы той чалавек, які шчаслівы ў сябе дома”, – разважае герой. – А калі яшчэ любіш і цэніш сваю працу, камфортна адчуваеш сябе ў працоўным калектыве, то можна сказаць, што ты ўдвая шчаслівы”.
Каля тысячы кіламетраў паветраных ліній Петрыкаўшчыны падпарадкоўваюцца нашым энергетыкам. Напярэдадні прафесійнага свята хочацца падзякаваць кожнаму члену працоўнага калектыву Петрыкаўскага РЭС за добрасумленную, шчырую працу. Няхай ваша праца прыносіць камфорт і радасць не толькі спажыўцам электраэнергіі, але і кожнаму з вас.
Святлана СОБАЛЕВА.
Фота Арцёма ГУСЕВА, Галіны КАЗАК.
Оставить комментарий