На Петрыкаўшчыну вясна прыйшла не толькі з першымі кветкамі, але і з новымі ініцыятывамі ад навучэнцаў устаноў адукацыі! На гэты раз карэспандэнт газеты наведала школьную майстэрню Пціцкай сярэдняй школы, дзе хлопчыкі паказалі сапраўдны майстар-клас пад дэвізам: “Кармушкі і шпакоўні – урокі клопату і адказнасці для дзяцей”.
Красавік – час абуджэння прыроды, калі прылятаюць птушкі і пачынаюць рыхтавацца да новага сезону размнажэння. Адным з самых добрых і карысных спраў у гэты час з’яўляецца развешванне кармушак і шпакоўняў.
Навучэнцы 5-7 класаў Пціцкай сярэдняй школы актыўна займаюцца дадзеных рэчаў і кармушак для птушак. Гэта важная акцыя накіравана не толькі на дапамогу птушкам, але і на выхаванне ў дзяцей беражлівых адносін да прыроды.
Пад кіраўніцтвам настаўніка працоўнага навучання Віктара Зубара, яны ператварылі звычайны ўрок працы ў займальны і карысны занятак.
– Мяне мая работа задавальняе, праўда крыху крыва атрымалася, але нядрэнна. Ведаеце, навошта гэта трэба? Каб птушкам было дзе абаснавацца, – расказвае вучань школы Арцём Сігай, дэманструючы зробленую шпакоўню.
Рабяты падзяліліся, што ўжо ведаюць, як правільна выбіраць матэрыял, зрабіць канструкцыі з дрэва трывалымі і даўгавечнымі, каб яны маглі праслужыць не адзін сезон. Да таго ж падчас працы ў майстэрне было шмат вясёлых момантаў і смеху, што стварыла выдатную атмасферу для сумеснай творчасці.
– Шпакі і іншыя птушкі вясной шукаюць бяспечныя месцы для гнездавання. Многія з іх сутыкаюцца з праблемамі – адсутнасць прыродных хованак, разбурэнне месцаў пасялення. Вырабляючы шпакоўні, рабяты не толькі дапамагаюць птушкам знайсці хатку, але і вучацца паважаць прыроду.
Наш “працоўны дэсант” развешвае кармушкі і шпакоўні не толькі на тэрыторыі школы, але і па вуліцах аграгарадка, паблізу ракі. У мінулым годзе для Пціцкага лясгаса мы вырабілі больш за 100 шпакоўняў, гатовыя да працы і сёлета. Наша задача, каб птушкі ў акрузе былі забяспечаны ўтульнымі хаткамі. Праз такія простыя дзеянні мы выхоўваем будучае пакаленне, экалагічна ўсвядомленых грамадзян, якія будуць клапаціцца пра прыроду нашага раёна і яго насельніках, – адзначыў Віктар Васільевіч.
Марыя ТАМКО, фота аўтара.
Оставить комментарий