Высяленне за даўгі па аплаце ”камуналкі”

Чым рызыкуюць грамадзяне, якія маюць доўгую запазычанасць па аплаце жыллёва-камунальных паслуг, ведаюць, напэўна ўсе. У распараджэнні супрацоўнікаў мясцовых органаў улады ёсць шырокі арсенал спосабаў уздзеяння на неплацельшчыкаў – ад пісьмовых папярэджанняў і наведванняў дома да адключэння камунальных паслуг, адабрання маёмасці і забароны на выезд з краіны. Высяленне з жылля – крайняя мера. Але менавіта яна была прыменена да жыхаркі аграгарадка Навасёлкі.

Гора-гераіня сённяшняга матэрыялу сустрэла начальніка Петрыкаўскага раённага аддзела прымусовага выканання, работнікаў камунальнай і газавай служб у сваёй, ужо былой кватэры, у разгубленасці. Жанчына была папярэджана, што сёння будзе здзяйсняцца працэдура яе высяленне з дзяржаўнага жылля  за працяглую нявыплату камунальных паслуг. У пакоях ужо сабраны асабістыя рэчы, разабрана для вынаскі мэбля. Гледзячы на ​​зямлячку адчуваеш не жаль, а здзіўленне. Чаму сітуацыя дайшла да крытычнай кропкі? На гэтае пытанне жанчына адказала сама ў час размовы, пакуль выносілі яе рэчы.

– У мяне было дастаткова часу на тое, каб пагасіць запазычанасць – прызнаецца жанчына. – Не прыслухалася я ні да парад, ні да патрабаванняў. Думала: з часам усё аплачу і на многія рэчы як жанчына, маці, гаспадыня не зважала ўвагі. За што і паплацілася.

Жанчына не хавае, што яе сям’я знаходзілася ў сацыяльна-небяспечным становішчы. Дзіцяці адпаведныя службы адабралі, і далі маці час на выпраўленне. Зямлячка запэўнівае: яна ўсё зробіць для вяртання малога. Працаўладкавалася ў сельскую гаспадарку ў іншым населеным пункце, дзе ёй прапанавалі пустуючы дом. З заработнай платы будуць утрымліваць элементы на ўтрыманне дзіцяці і аплату запазычанасці па камунальных паслугах. На астатнія сродкі патрэбна ўладкоўваць побыт у новым жыллі.

– Падобныя рэйды, на жаль не адзінкавыя, дзеліцца начальнік Петрыкаўскага раённага аддзела прымусовага выканання Уладзімір Аскерка. – У мінулым годзе чатыром сем’ям за працяглую нявыплату камунальных паслуг без на тое прычын было “ўказана на дзверы”. – У бягучым годзе, акрамя сённяшняга выпадку,  ужо прыйшоў выканаўчы дакумент на высяленне сям’і па вышэйадзначанай прычыне ў горадзе. Усе гэтыя факты гавораць, пра тое, што чалавек не павінен так безадказна ставіцца да сваіх абавязкаў грамадзяніна краіны. Ёсць розныя варыянты пазбегнуць самага горшага. Дзякуючы сацыяльна арыентаванай тарыфнай палітыцы дзяржавы на долю камунальных плацяжоў прыпадае нязначная частка даходу нават у чалавека з невялікім заробкам. Але лепшы спосаб застрахавацца ад судовых разбірацельств і магчымага высялення – своечасова аплачваць спажытыя паслугі.

 Святлана СОБАЛЕВА, фота аўтара.