“Вялікая сям’я ­­­– падарунак лёсу і паўсядзённая праца”

У Конкавіцкай сярэдняй школе 14 кастрычніка віншаванні прымалі жанчыны-маці. Асабліва прыемна адзначыць, што ў працоўным калектыве ёсць шматдзетная маці, член грамадскага аб’яднання “Беларускі саюз жанчын”, у свой час узнагароджана Ордэнам Маці.

Амаль што ўся сям’я Галіны Абібак, маці пяці хлопцаў, сабралася разам. Цікава тое, што сыны Галіны Мікалаеўны самі вырашылі зрабіць сюрпрыз матулі і прыехалі ў гэты дзень з розных куткоў нашай краіны: хто з Мінска, хто з Мазыра, хто з Жыткавіч на дзіцяча-бацькоўскую канферэнцыю ў Конкавіцкую сярэднюю школу, у якой працуе іх матуля. Пяцёра сыноў з букетамі чырвоных ружаў зашлі ў актавую залу і павіншавалі сваю самую дарагую жанчыну. Кожны з іх ужо стаў дарослым, самарэалізаваўся ў жыцці, але ў сэрцы маці яны назаўжды застануцца маленькімі хлопчыкамі. Яны памятаюць, як у дзяцінстве матуля ахутвала іх пяшчотай, як вучыла сумленнай працы і гатавала незлічоныя смачныя сняданкі.
У актавай зале школы перад сваімі настаўнікамі і навучэнцамі сям’я падзялілася ўспамінамі пра бесклапотнае дзяцінства, мужчыны ўспомнілі пацешныя выпадкі з жыцця і з усмешкай слухалі, як мама распавядала пра свае метады выхавання.
Нягледзячы на тое, што сыны на адлегласці, яны кожны дзень тэлефануюць матулі, каб даведацца пра яе справы і расказаць пра сваё жыццё.
Успаміналі, што не заўсёды было лёгка: прыходзілася дапамагаць бацькам па гаспадарцы. У кожнага былі свае хатнія абавязкі. Узгадалася, як усёй сям’ёй хадзілі па чарніцы, каб сабраць хлопцаў у школу, і вялі спіс, хто больш зарабіў для сям’і. Галіна Мікалаеўна з гонарам расказвала пра тое, што ніколі ад сваіх дзяцей не чула ніводнага дрэннага слова.
Цяпер, калі кожны з іх мае свае клопаты і цяжкасці, іх аб’ядноўвае адзінае ­– жаданне зрабіць матулі нешта прыемнае. У гэты дзень кожны з сыноў выказаў сваю падзяку і любоў.
Сям’я ­– гэта не толькі адна кроў, але і падтрымка, магчымасць зрабіць жыццё лепшым і ярчэйшым. І гэты дзень паказаў нам прыклад такой сям’і, у якой правільнае выхаванне адыграла вялікую ролю.
А мы, прысутныя, гледзячы на дружную сям’ю Абібак, дакладна можам сказаць: “Вялікая сям’я – гэта падарунак лёсу і паўсядзённая праца”.

Юлія Несцярэня,
педагог ДУА ”Конкавіцкая сярэдняя школа”.