Войска гартуе характар

У 71-м асобным пуцявым чыгуначным батальёне 30-й асобнай чыгуначнай брыгады праходзіць тэрміновую ваенную службу Дзяніс Сідарэнка.

У маі 2024 года ўраджэнец вёскі Слабада Петрыкаўскага раёна Дзяніс Сідарэнка быў прызваны ў 30-ю асобную чыгуначную брыгаду. У войску ён паспяхова асвоіў ваенную ўліковую спецыяльнасць, праявіў сябе чалавекам адказным, які імкнецца выканаць пастаўленую задачу добрасумленна і ў тэрмін. Ды і ў калектыве Дзяніс набыў аўтарытэт і павагу, таму не дзіўна, што ў хуткім часе яго прызначылі намеснікам камандзіра ўзвода.

Па словах сяржанта Дзяніса Сідарэнкі, быць малодшым камандзірам няпроста, бо адказнасць даводзіцца несці не толькі за сябе, але і за падначаленых. Пры гэтым неабходна заставацца ўважлівым да таварышаў, унікаць у праблемы, шукаць шляхі іх вырашэння.

– Не мне даваць ацэнку, наколькі ў мяне атрымліваецца быць добрым малодшым камандзірам. Але я стараюся, – распавёў сяржант Дзяніс Сідарэнка. – Азіраючыся назад, магу з упэўненасцю сказаць, што служба ў войску дала свой плён. Я стаў больш развіты фізічна, больш дысцыплінаваны, знайшоў сапраўдных і верных  таварышаў. Прайшоўшы тэрміновую ваенную службу, я з поўнай упэўненасцю магу сказаць, што гэты важны этап у жыцці мужчыны павінен прайсці кожны. Як бы банальна ні гучала, але гэта ісціна: войска гартуе характар.

Камандаванне 30-й асобнай чыгуначнай брыгады.