Віншуем, навасёлы!

У мікрараёне Паўночны адбылося ўрачыстае ўручэнне ключоў навасёлам 60-кватэрнага дома па вуліцы Дружбы, 20.

Выступаючы з прамовай з нагоды ўрачыстасці, генеральны дырэктар ААТ «Беларуськалій» Андрэй Рыбакоў адзначыў: «Хацеў бы пажадаць усім цеплыні і ўтульнасці, дзіцячых усмешак і смеху, што будуць панаваць у новых кватэрах. Прымнажайце і ўпрыгожваеце новае месца свайго жыхарства. Гэта не апошні аб’ект, які рэалізоўвае на Петрыкаўшчыне «Беларуськалій», вельмі важна, апрача належных, камфортных умоў працы стварыць для людзей і  годную інфраструктуру, месцы адпачынку, у першую чаргу для актыўнага ладу жыцця. Таму на чарзе ўзвядзенне ў Петрыкаве фізкультурна-здараўленчага цэнтра».

Старшыня райвыканкама Аляксандр Верамееў далучыўся да віншаванняў: «Хочацца пажадаць усім здароўя, радасці, здзяйснення самых запаветных мар, міру ўсяго самага найлепшага».

Выхаванцы дзіцячага садка чыталі вершы і прапанавалі ўвазе прысутных танец. Пасля прагучала вакальная кампазіцыя ў выкананні спецыяліста Петрыкаўскага рудаўпраўлення Ангеліны Марозька. За тым навасёлы атрымалі запаветныя ключы ад кватэр у сучасным доме, а Андрэй Рыбакоў разам з Аляксандрам Верамеевым і намеснікам дырэктара па ідэалагічнай рабоце Мазырскага домабудаўнічага камбінату Вольгай Собалевай перарэзалі сімвалічную чырвоную стужку.

Жыхары спяшаліся агледзець новыя кватэры. Да некаторых з жыхароў дома № 20 завіталі пачэсныя госці. У пад’ездах сапраўды было чуваць дзіцячы смех. Віншуем навасёлаў з такой значнай падзеяй у іх жыцці!

Арцём Гусеў.
Фота аўтара.