Па выніках 8 месяцаў бягучага года на аб’ектах чыгуначнага транспарту, размешчаных на тэрыторыі Гомельскай вобласці, учынена 15 крадзяжоў маёмасці грамадзян і юрыдычных асоб, з якіх 6 – у пасажырскіх цягніках.
Як правіла, крадзяжы адбываюцца з-за бестурботнага стаўлення грамадзян да сваёй маёмасці. Часта яны пакідаюць яе без нагляду або пад наглядам незнаёмых грамадзян, а пасля вяртання ні сваіх рэчаў, ні названых грамадзян на месцы не знаходзяць.
Распіццё спіртных напояў, у тым ліку з малазнаёмымі людзьмі, з’яўляецца яшчэ адной перадумовай для таго, каб стаць ахвярай злачынцаў. Пасля распіцця алкагольных напояў пацярпелыя, як правіла, губляюць пільнасць ці засынаюць, а злачынец, скарыстаўшыся гэтым, выкрадае іх рэчы.
Мы звярнуліся да старшага ўчастковага інспектара міліцыі Дзмітрыя Хамені з просьбай нагадаць простыя правілы пільнасці і абачлівасці, выкананне якіх дапаможа пазбегнуць непрыемных сітуацый на чыгуначных вакзалах і ў цягніках і прадухіліць здзяйсненне супрацьпраўных дзеянняў у дачыненні да пасажыраў і прыналежнай ім маёмасці.
– Па-першае, пачну з таго, што ні ў якім выпадку нельга ўжываць падчас паездкі алкаголь, тым больш з выпадковымі спадарожнікамі, якія спрабуюць увайсці да вас у давер.
Таксама не варта падчас знаходжання на вакзалах, станцыях і ў цягніках пакідаць асабістыя рэчы без нагляду, як і давяраць іх захаванасць выпадковым знаёмым. Заўсёды перад выхадам з вагона правярайце наяўнасць сваіх рэчаў пры сабе, – пачаў свой інструктаж участковы і працягнуў: – Кожнаму добра вядома няхітрае правіла, што нельга выкладваць у лёгкадаступным месцы, навідавоку ў старонніх дакументы, грошы, мабільныя тэлефоны і іншыя каштоўныя рэчы. Увогуле, лепш перад паездкай у цягніку цалкам зарадзіць свае мабільныя прылады, а калі гэтага зрабіць не ўдалося, то пры выкарыстанні агульнадаступных разетак для падзарадкі не трэба пакідаць гэтыя прылады без нагляду.
Нагадаў участковы і пра тое, што не варта класці ўсе грашовыя сродкі ў адно месца. Наяўныя грошы для дробных выдаткаў лепш трымаць асобна ад буйной сумы.
– Яшчэ хацелася б звярнуць увагу на той факт, што не трэба адгукацца на сумнеўныя просьбы правесці пасылкі ці іншыя прадметы з наступнай перадачай іх невядомым асобам у іншым населеным пункце. У іх могуць аказацца наркотыкі ці іншыя забароненыя ў абароце рэчывы і прадметы. Пры выяўленні падазроных безгаспадарных прадметаў не дакранайцеся да іх і неадкладна паведаміце пра гэта супрацоўнікам міліцыі, правадніку вагона, білетнаму касіру ці іншаму працаўніку транспарта, – папярэдзіў праваахоўнік.
І яшчэ, як параіў суразмоўца, падчас паездкі ў цягніках рэгіянальных ліній у вячэрні і начны час, размяшчацца лепш у добра асветленых вагонах, у якіх ёсць пасажыры, або ў галаўным вагоне цягніка, дзе ў выпадку небяспекі вы хутчэй зможаце звярнуцца за дапамогай да работнікаў лакаматыўнай брыгады.
– Калі ў адносінах да вас ці навакольных усё ж учынена супрацьпраўнае дзеянне, неадкладна заявіце пра гэта супрацоўнікам міліцыі або работнікам транспарту, якія ў далейшым праінфармуюць праваахоўныя органы, – пазначыў у завяршэнні размовы старшы ўчастковы інспектар міліцыі Дзмітрый Хаменя.
Запісала Галіна КАЗАК.
Оставить комментарий