Як вядома, без жартаў і смеху наша жыццё было б проста невыносным і бессэнсоўным! Напярэдадні сусветнага Дня гумару адбылася фінальная гульня раённага Сезона гульняў КВЗ сярод школьных каманд. У мерапрыемстве прынялі ўдзел каманды Ляскавіцкай, Галубіцкай сярэдніх школ, №1, №2 горада Петрыкава.
КВЗ – сапраўды нестарэючы і любімы многімі конкурс, дзеля якога можна ахвяраваць вольным часам, нават перапіскай у Instagram. А як інакш растлумачыць, што ў апошні дзень вясновых канікул у актавай зале ”Сярэдняй школы №2 г.Петрыкава” сабраліся школьнікі, пры гэтым не толькі ўдзельнікі, але і групы падтрымкі.
Юнакоў і дзяўчат чакаў сапраўдны КВЗ, да якога яны старанна і адказна рыхтаваліся. 
У зале панавала атмасфера гумару і творчасці! Гэты дзень запомніцца яркімі выступленнямі, жартамі і сяброўскай атмасферай. Хочацца адзначыць вастрыню жартаў, цікавыя сцэнкі, смешныя мініяцюры і акцёрскае майстэрства, якое паказалі рабяты.
Спаборнічалі каманды ў трох конкурсах:
Прывітанне – каманды прадставілі візітныя карткі ў фірмовым стылі.
Візітоўка – конкурс, з якога складваецца першае ўражанне пра каманды, таму для ўдзельнікаў было важна ўразіць, рассмяшыць, прымусіць журы і гледачоў смяяцца.
Размінка – імправізацыя на пытанні журы. У гэтым конкурсе рабяты актыўна праяўляюць сваю знаходлівасць. Камандам задаецца герой, затым сітуацыя, у якую ён трапіў і ўдзельнікі каманды адразу прыдумляюць мініяцюры, як працяг зададзенай сітуацыі.
Дамашняе заданне – “Казка на новы лад”. Дзякуючы добрай гульні ўдзельнікаў, конкурс атрымаўся вельмі цікавым і смешным.
На сцэне ўдзельнікі адчувалі сябе ”як рыба ў вадзе”. Бо вядома, што нават вельмі добры жарт, згуляны без эмоцый, будзе правальны. Каманды праявілі сябе ў конкурсах, падарыўшы гледачам мора смеху і станоўчых эмоцый.
Прыйшоў час падняцца на сцэну членам журы, каб агучыць вынікі конкурсу. Хто перамог? Інтрыга раскрытая! Месцы размеркаваліся наступным чынам:
Дыплом ІІІ ступені ў каманды Галубіцкай сярэдняй школы!
Дыпломам І ступені ганараваны 2 каманды – “Сярэдняя школа №2 г. Петрыкава” і каманда “Сярэдняй школы № 1 г. Петрыкава”.
Пераможцы гульні прадставяць наш раён на абласным этапе у наступным годзе.
Без перабольшанняў – у Петрыкаўскім раёне расце новае пакаленне таленавітых гумарыстаў.
Фінал КВЗ стаў выдатным завяршэннем вясновых канікул. Дарагія ўдзельнікі конкурсу, наперадзе ў вас яшчэ шмат новых гарызонтаў і перамог. Жадаем вам не спыняцца на дасягнутым! Няхай ваша энергія, талент і гумар натхняюць новых удзельнікаў КВЗ у нашым раёне!
Марыя Тамко, фота аўтара.
Оставить комментарий