Цягавітасць, хуткасць, трапнасць

На базе сярэдняй школы № 1 горада Петрыкава прайшоў раённы этап ваенна-патрыятычнай гульні “Зарніца”, на якую сабраліся школьнікі.

На працягу некалькіх гадзін юнакі і дзяўчаты дэманстравалі навыкі і ўменні па асновах дапрызыўнай падрыхтоўкі, а таксама ўзровень ведаў пра значныя падзеі нашай краіны.
У конкурсе прынялі ўдзел 14 устаноў адукацыі раёна. Свае навыкі і ўменні – дэманстравалі вучні сярэдніх класаў ва ўзросце ад 13 да 14 гадоў.
Арганізатарам мерапрыемства выступіў Петрыкаўскі раённы цэнтр творчасці дзяцей і моладзі.
Патрыятычная гульня ставіць перад сабой мэту развіваць цягавітасць, хуткасць, трапнасць, выхоўваць у дзяцей пачуццё ўзаемадапамогі, развіваць уменне працаваць у камандзе.
Ваенна-спартыўную гульню савецкіх піянераў “Зарніца” часам называюць самай масавай гульнёй XX стагоддзя. Актыўна ўдзельнічаюць у ёй сучасныя школьнікі. Раскрываюць свае навыкі па пачатковай ваеннай падрыхтоўцы, праяўляюць лідарскія якасці, спартыўныя і творчыя здольнасці. Як адзначылі арганізатары гульні, важна, каб кожны ўдзельнік вырас годным грамадзянінам нашай краіны, а для гэтага трэба шмат працаваць: вучыцца, займацца спортам, радаваць блізкіх сваімі поспехамі і імкнуцца стаць сапраўдным абаронцам нашай Радзімы. На шчасце, мы з вамі жывем пад сонечным мірным небам і давайце заўсёды памятаць аб тым нялёгкім ваенным часе, аб тых людзях, якія абаранілі нашу краіну.
Гульня ўключала ў сябе разборку і зборку аўтамата Калашнікава, зараджанне магазіна вучэбнымі патронамі, разраджэнне магазіна, аказанне першай даўрачэбнай дапамогі ўмоўнаму пацярпеламу.
Таксама ўдзельнікі “Зарніцы” пра-дэманстравалі свае навыкі ў конкурсе па страявой падрыхтоўцы.
Ва ўрачыстай абстаноўцы былі аб’яўлены пераможцы, адбылося ўзнагароджанне дыпломамі. Пераможцамі ў агульнакамандным заліку сталі: трэцяе месца ў каманды Капаткевіцкай сярэдняй школы, другое месца ў каманды Капцэвіцкай сярэдняй школы, а пераможцамі гульні стала каманда з гарадской школы № 2, вучні будуць прадстаўляць раён на абласным этапе.

Наталля ПЕТРУШЭНКА.
Фота аўтара.