У суботу на ячменным палетку БК-АГРА ААТ “Чалюшчавічы” ажыла старажытная традыцыя, напоўненая сакральным сэнсам, – абрад “Зажынкі” даў старт уборачнай кампаніі. Яго ўдзельнікамі сталі кіраўніцтва раёна, кіраўнікі і спецыялісты сельгасхарчу і сельгаспрадпрыемстваў Петрыкаўшчыны, хлебаробы ААТ ”Чалюшчавічы”.
Раённае свята пачатку ўборачнай страды “Зажынкі-2025” сімвалічнай песняй “Зажынкі” адкрыў ансамбль “Лявоніха”, стварыўшы тым самым настрой усеагульнай радасці і датычнасці да вялікай справы – жніва.
З віншаваннямі з нагоды пачатку страды і шчырымі пажаданнямі да хлебаробаў звярнуўся старшыня раённага выканаўчага камітэта Аляксандр Верамееў.
– Сёння мы даем старт самай адказнай і напружанай пары для кожнага аграрыя – жніву, – падкрэсліў кіраўнік раёна. – Уборачная кампанія – ключавая падзея, якая вызначае харчовую бяспеку нашага раёна і ўсёй краіны. Дзякуючы вашай зладжанай працы, своечасовай сяўбе, захаванню тэхналогіі падчас вегетацыі раслін, ёсць усе падставы меркаваць, што сёлета мы атрымаем нядрэнны вынік. Упэўнены, нашы хлебаробы, сапраўдныя працаўнікі зямлі, праявяць максімальнае майстэрства і самааддачу. Цяпер самае галоўнае – гэта дакладная дысцыпліна, зладжанасць у працы і максімальная канцэнтрацыя намаганняў кожнага на дасягненне пастаўленых задач. А яны ў нас простыя і зразумелыя кожнаму ўдзельніку жніва – убраць збожжа якасна і без страт. Жадаю ўсім моцнага здароўя, спрыяльнага надвор’я і, вядома ж, высокіх намалотаў!
Услед за выступленнем кіраўніка раёна адбылася цырымонія ўшанавання галоўных герояў жніва – механізатараў. Як спявалася ў песні, зусім хутка камбайнеры “разбудзяць” ніву і пачнецца адказная і напоўненая штодзённымі клопатамі пара для ўсіх хлебаробаў. Яны верна і аддана будуць служыць сваёй зямлі, як заўсёды ёй служылі беларусы.
Нашыя продкі верылі, што напачатку жніва трэба было з любоўю дамовіцца з матухнай-зямлёй і падзякаваць ёй за падораны ўраджай. Арганізатары мерапрыемства захавалі традыцыю: жніво пачалі з таго, што старэйшая жанчына прынесла на ўскрай поля каравай з былога ўраджаю, як даніну зямлі і пахвалу Богу.
У знак сардэчных пачуццяў ад хлебаробаў раёна каравай прымалі старшыня раённага выканаўчага камітэта Аляксандр Верамееў, яго намеснік Алег Козінец, кіраўнікі сельгаспрадпрыемстваў Петрыкаўшчыны.
У даўнія часы нашы продкі, перш чым прыступіць да жніва, звярталіся да нябёсаў з маленнямі аб спрыяльным надвор’і і багатым ураджаі. З верай у сілу зямлі, яны з малітвай зажыналі першы сноп і апявалі працу хлебаробаў.
Не стаў выключэннем і абрад на чалюшчавіцкім “Вялікім полі”. Па старажытным звычаі, менавіта жанчыны, як берагіні беларускай зямлі, першымі выйшлі ў поле.Старэйшая жняя Тамара Піліпенка з жанчынамі і маладымі дзяўчатамі сярпамі зрэзалі першы сноп новага ўраджаю.
Пад народныя абрадавыя песні кіраўніку раёна перадалі першы зажыначны сноп, каб жніво прайшло без страт, каб тэхніка не псавалася, каб Бог даў здароўя ўсім удзельнікам уборачнай кампаніі.Святочныя зажыначныя снапы па традыцыі атрымалі ўсе кіраўнікі гаспадарак раёна.
Са словамі благаслаўлення першага снапа і пачатку жніва да ўдзельнікаў раённага свята “Зажынкі-2025” звярнуўся настаяцель храма “Нечаканая радасць” Айцец Сергій Капітан, які правёў брад асвячэння поля, тэхнікі, снапоў і ўсіх прысутных.
Хлеб і квас – нязменныя атрыбуды зажыначнага свята. Дзяўчаты ў нацыянальных строях шчодра частавалі ўсіх прысутных традыцыйным асвяжальным квасам і духмянай, яшчэ цёплай выпечкай, – сімвалам урадлівасці беларускай зямлі і яе гасціннасці.
Урачыстая цырымонія Зажынак, якая прайшла ў поўнай адпаведнасці са спрадвечнымі беларускімі традыцыямі, завяршылася самым галоўным – сігналам да пачатку жніва. Магутныя камбайны з лепшымі механізатарамі ААТ “Чалюшчавічы” за штурваламі, якія ўжо сталі на ўскраінку залацістага поля, дружна рушылі на палетак. Першыя снапы новага ўраджаю хутка запоўнілі бункеры, азнаменаваўшы пачатак адказнай гарачай пары на петрыкаўскай зямлі. Раён упэўнена ўступіў у пару жніва, несучы ў будучыню векавыя традыцыі і абапіраючыся на працу сучасных хлебаробаў.
Старт жніву дадзены! Высокіх намалотаў, шаноўныя!
Галіна КАЗАК,
фота аўтара.
Оставить комментарий