Непрыемны факт днямі трапіў у поле зроку нашага карэспандэнта: у ажыўленым месцы райцэнтра, каля аднаго з адміністрацыйных будынкаў, “расце” сухое дрэва.
Бяроза вышыней каля 5 метраў размясцілася на ўзбочыне паміж тратуарам і праезнай часцю па вуліцы Вароўскага.
Зусім не дзеля згушчэння фарбаў, нагадаем: пры неспрыяльных умовах надвор’я сухастойнае дрэва тоіць рэальную пагрозу здароўю пешаходаў і маёмасці аўтааматараў. Тым больш, што ў нашым выпадку дрэва суседнічае не толькі з праезнай часцю – побач знаходзіцца аўтамабільная паркоўка. Да таго ж сітуацыя мае і эстэтычны хіб: алея з дрэў уздоўж тратуара выглядае зусім не прывабна.
Выдаліць аварыйнае дрэва – справа некалькіх гадзін. Вось толькі невядома, чаго чакаюць адказныя асобы? Няўжо нікому не кідаецца ў вочы аджыўшае свой век сухое дрэва? Няўжо варта адбыцца нечаму непапраўнаму, перш чым мы актывізуемся ў вырашэнні надзённых пытанняў нашай агульнай справы – навядзенні парадку на зямлі і добраўпарадкаванні малой радзімы.
В. МІКАЛАЕВА. Фота аўтара.
Оставить комментарий