На мінулым тыдні парк вытворчага ўчастка “Петрыкаў” філіяла №13 Адкрытага акцыянернага таварыства “Гомельаблаўтатранс” папоўніўся новым турыстычным аўтобусам. Вядома ж, многіх цікавяць характарыстыкі транспартнага сродку і выгоды, якія адкрываюцца для транспартнікаў і іх кліентаў.
Тэхніка кітайскай маркі “Джон Тонг” зіхацела фірменнымі бела-сінімі колерамі “Гомельаблаўтатранса” пад прамянямі майскага сонца. Не марнуючы час, накіроўваемся да інжынера вытворчага ўчастку Наталлі Шабалтас, якая хутка ўводзіць у курс справы: “Аўтобус разлічаны на 51-но пасажырскае месца і адпавядае ўсім запытам сучаснага турыста.
На борце ёсць усё для камфортнага пераезду на далёкія адлегласці. За належную тэмпературу і вільготнасць у салоне адказвае клімат-кантроль, не застацца без інтэрнэт-сувязі дапаможа Wi-Fi і, канешне, для кожнага пасажыра прадугледжаны USB-парты для зарадкі гаджэтаў. Бавіць час на шляху да пункту прызначэння можна за праглядам мастацкіх фільмаў ці пазнавальна-забаўляльных перадач – для гэтага ў аўтобусе ўсталяваны два тэлевізары.
Не варта хвалявацца і за прыдатнасць прадуктаў харчавання, якія вандроўцы бяруць з сабой у дарогу – для гэтых патрэб у наяўнасці халадзільнік. Наталіць смагу можна заварыўшы гарбату альбо каву: у распараджэнні кліентаў ёсць кулер з гарачай і халоднай вадою. Нашыя спецыялісты, у сваю чаргу, зробяць усё, каб маршрут для пасажыраў аказаўся зручным і, галоўнае, бяспечным”.
Новы транспартны сродак даверылі Сяргею Дарафею – кіраўніцтва адзначае яго як кемлівага і адказнага вадзіцеля. Акрамя гэтага Сяргей Іванавіч мае вопыт кіравання гэтай мадэллю, бо летась вазіў турыстаў на такім аўтобусе ў Грузію. “Нараканняў на тэхніку, па маім папярэднім досведзе, няма. Са станоўчых рыс магу адзначыць устойлівасць машыны і яе надзейныя, прадказальныя паводзіны на дарозе”, – падзяліўся прафесійным меркаваннем мужчына.
Першымі пасажырамі аўтобуса сталі працаўнікі Петрыкаўскага рудаўпраўлення ААТ “Беларуськалій”, якія на выхадных наведвалі Брэсцкую крэпасць-герой і горад Брэст. Што да далейшых перспектыў, то яны дакладна вызначаны: “Гомельаблаўтатранс” заключыў дагаворы з турыстычнымі фірмамі на пасажыраперавозкі грамадзян з Беларусі ў Абхазію. Графік маршрутаў ужо распрацаваны: першы рэйс распачнецца 18 чэрвеня з Мінску, а ўсяго працягам 3-х месяцаў такіх паездак запланавана дзесяць. Паміж міжнароднымі рэйсамі транспартны сродак будзе вазіць дзяцей на аздараўленне, у тым ліку з абласнога цэнтра ў ДРАЦ “Пціч”. Акрамя гэтага разглядаецца магчымасць арганізацыі рэйса ў Санкт-Пецярбург.
Кошт аўтобуса – 344, 2 тысячы рублёў. Дарэчы, гэта не першае і не апошняе папаўненне петрыкаўскага транспартнага пар-ку за апошні час. Працягам мінулага і гэтага года сюды прыбылі дзве ГАЗэлі, адну з якіх прадпрыемства таксама набыло за ўласныя сродкі. У чацвёртым квартале мясцовыя транспартнікі чакаюць чарговы аўтобус, на гэты раз нізкападлогавы, гарадскога тыпу.
Арцём ГУСЕЎ.
Фота аўтара.
Оставить комментарий