Сёння, на абласных Дажынках, якія праходзяць у гарадскім пасёлку Карма, Падзякай Прэзідэнта Рэспублікі Беларусь за вялікі ўклад у сацыяльна-эканамічнае развіццё краіны і дасягненне высокіх вытворчых паказчыкаў ганаравана СУП “Палессе-Аргаінвест”. Пра працоўныя поспехі і зладжаную работу калектыву мы пагутарылі з выконваючай абавязкі дырэктара гаспадаркі Аленай Асадчай.
Алена Мікалаеўна адразу прызналася, што адчувае сябе крыху няёмка, бо на пасадзе выконваючай абавязкі дырэктара сельгаспрадпрыемства нядаўна, а вытворчыя поспехі – вынік многіх гадоў руплівай працы калектыву і папярэдніх кіраўнікоў, у прыватнасці – Аляксандра Верамеева.
“Наша прадпрыемства было створана ў 2005 годзе, калі былі аб’яднаныя КСУПы “Петрыкаў”, “Мышанка”, “Саўгас Прыпяцкі” і “Галубіца”. Зараз у “Палессі-Аграінвест” працуе 443 чалавекі. Плошча нашых сельскагаспадарчых угоддзяў складае звыш 13 тысяч гектараў з сярэднім балам урадлівасці 19,9. На год палеткі дазваляюць нам атрымліваць больш за 27 тысяч тон кармавых адзінак.
Што да жывёлагадоўлі, то па стане на 1 верасня на прадпрыемстве ўтрымліваецца 9840 галоў буйной рагатай жывёлы, у тым ліку 2729 кароў дойнага статку.
За студзень-жнівень сярэдні ўдой ад каровы склаў 4706 кілаграмаў а сярэднясутачнае прыбаўленне ў вазе буйной рагатай жывёлы – 808 грамаў”, – пазнаёміла з лічбамі Алена Асадчая.
За 8 месяцаў бягучага года сельгаспрадпрыемства рэалізавана на забой 1667 тон мяса буйной рагатай жывёлы, 12287 тон малака і 1310 тон мяса свіней (з улікам племяннога продажу). Такую высокую прадукцыйнасць дазволілі забяспечыць якасныя, паўнавартасныя кармы і створаныя належныя ўмовы ўтрымання жывёлы. Як следства – доля прадпрыемства ў вытворчасці валавай прадукцыі сельскай гаспадаркі раёна складае больш за 50,4 %, а ўдзельная вага ў выручцы сельскагаспадарчых арганізацый Петрыкаўшчыны – 63 %.
Вядома, мы не маглі не пацікавіцца сярэднім заробкам працаўнікоў флагманскай гаспадаркі раёна, на што Алена Мікалаеўна адзначыла: “Канешне, патэнцыял кожнага прадпрыемства вызначаюць яго кадры і матэрыяльная зацікаўленасць працаўнікоў – дзейсны стымул у выхаванні адказнасці і забеспячэнні прадукцыйнасці гаспадаркі. Сярэднямесячная заработная плата на прадпрыемстве за мінулы год склала 1720 рублёў, за 8 месяцаў 2024 года – 1922,5 рублі.
Калі казаць пра прыярытэты работы “Палесся-Аграінвест”, то мы асабліва засяроджваем увагу на перадавых тэхналогіях і дысцыпліне, штодзённа працуем па навядзенні парадку на зямельных угоддзях, аднаўленні вытворчых аб’ектаў, іх мадэрнізацыі. Безумоўна, нам усім вельмі прыемна атрымліваць Падзяку ад Прэзідэнта Рэспублікі Беларусь Аляксандра Лукашэнкі за высокую адзнаку нашай працы.
Хацелася б шчыра павіншаваць наш згуртаваны калектыў за плённую, стваральную працу, адданасць сваёй прафесіі – нашай агульнай справе і вынікі, якіх мы дасягнулі на карысць роднай краіны. Работа кожнага нашага працаўніка прымнажае ўвесь патэнцыял гаспадаркі, раёна, Беларусі і садзейнічае далейшаму ўмацаванню харчовай бяспекі дзяржавы”, – рэзюмавала Алена Асадчая.
Гутарыў Арцём ГУСЕЎ. Фота аўтара.
Оставить комментарий