Напярэдадні прафесійнага свята мы завіталі на Петрыкаўскае рудаўпраўленне ААТ “Беларуськалій”, дзе сустрэліся з начальнікам рудніка Міхаілам Міхнаўцом, які распавёў пра калектыў, спецыфіку работы на прамысловым гіганце, а таксама падвёў вынікі “шахцёрскага года”.
– Петрыкаўскае рудаўпраўленне на сённяшні дзень самы малады руднік ААТ “Беларуськалій”, аднак, як неаднаразова адзначалася, адзін з самых перспектыўных. У склад рудніка ўваходзіць 7 падраздзяленняў, якія займаюцца дабычай руды і яе дастаўкай канвеерным спосабам на месца пад’ёму. Там руда перадрабняецца да неабходнай фракцыі, пасля чаго накіроўваецца на фабрыку, дзе адбываецца працэс вытворчасці калійных угнаенняў. Напярэдадні свята некалькі слоў хочацца сказаць пра калектыў. Як я ўжо адзначаў, на рудніку 7 падраздзяленняў: 2 горныя ўчасткі, якія непасрэдна вядуць дабычу руды, і 5 падраздзяленняў, якія ажыццяўляюць абслугоўванне вытворчага працэсу. Менавіта зладжанай працай кожнага падраздзялення “куецца” агульны вынік, а ён сёлета неблагі. Па выніках “шахцёрскага года” мы маем 4 мільёна 700 тысяч тон руды – і гэта, паверце, годны паказчык. З пачатку работы РУ здабыта больш за 17 мільёнаў тон руды, агульны аб’ём выпрацовак склаў больш за 212 кіламетраў. Са складаных і адказных работ у “шахцёрскім годзе” былі выкананы пакарочванне забою лавы № 8-3, перамантаж дадзенай лавы і яшчэ двух (№ 8-1 і № 8-2) на новыя слупы. Адзначу, што гэтыя работы на рудніку выконваліся ўпершыню, тым каштоўней той вопыт, што набыў калектыў. Паспець у кароткі тэрмін, што было вельмі важна для рэалізацыі вытворчых задач, дапамаглі зладжанасць калектываў брыгад, надзейнае плячо і вопыт персанала іншых прамысловых пляцовак, а таксама граматныя дзеянні кіраўнікоў горных участкаў і спецыялістаў нашага рудніка. Хачу адзначыць прафесійную работу намеснікаў начальнікаў горных участкаў Дзмітрыя Хаміцэвіча і Аляксея Шыцікава. Маладыя людзі, якім няма яшчэ і трыццаці, маюць невялікі вопыт працы на прадпрыемстве, але ўжо дэманструюць высокі прафесіяналізм падчас выканання няпростых вытворчых задач.
Немагчыма было б выконваць вытворчыя задачы і без іншых маладых, але досыць граматных спецыялістаў. Гэта Кірыл Хоміч, які ў гэтым годзе прызначаны на пасаду энергетыка ПРМУ, кіраўнік дадзенага ўчастка Антон Цярэшчанка, электраслесар Аляксандр Маркевіч. На іх заўсёды можна разлічваць: у любы час сутак па званку яны выязджаюць на ўхіленне аварый па энергетычным абсталяванні, разумеючы сваю важную ролю ў агульным вытворчым ланцужку.
Што да іншых “здабыткаў” сёлетняга “шахцёрскага году”, то мы сталі праводзіць бураўзрыўныя работы ўласнымі сіламі, без прыцягнення іншага персаналу. Гэта вялікая заслуга Юрыя Жукоўскага, Дар’і Волкавай – іх намаганнямі было арганізавана навучанне работнікаў з наступным атрыманнем адпаведных пасведчанняў. Не магу не адзначыць калектыў ПУВРКТ, іх імкненне да стабільнай працы, якая напрамую ўплывае на выкананне вытворчых задач, што стаяць перад рудніком. На гэта работнікаў нацэльваюць начальнік участка Сяргей Кяцко, механік Мікалай Полаз, электрамеханік Арцём Мігун. Сваім добрасумленным стаўленнем да працы заслугоўвае слоў падзякі за ўтрыманне аўтатрактарнай тэхнікі ў належным стане калектыў ПУВРСТ. Асаблівая падзяка слесару па рамонце аўтамабіляў Дзмітрыю Філіповічу, вадзіцелю пагрузчыка Аляксандру Буракевічу, майстру ўчастка Сяргею Барткевічу і механіку Яўгену Глушко. Як заўсёды стабільна адпрацаваў “шахцёрскі год” участак уздыму пад кіраўніцтвам Аляксандра Кавалені. Вялікі ўклад у працоўныя перамогі рудніка ўносяць галоўны механік Раман Бяскосты і галоўны энергетык Васіль Бачышча. Вынікі, якімі сёння ганарыцца руднік Петрыкаўскага рудаўпраўлення – заслуга ўсіх спецыялістаў.Калі нават ваша прозвішча не прагучала, ведайце, калегі, за агульныя дасягненні я ўдзячны кожнаму з вас, – пазначыў суразмоўца.
Петрыкаўскае рудаўпраўленне да ўсяго іншага жыве насычаным культурнымі, спартыўна-масавымі мерапрыемствамі жыццём, дзе супрацоўнікі праяўляюць сябе з самага лепшага боку. Так, каманда “Баявая змена” выйграла золата ў раённай ваенна-прыкладной гульні “Прарыў”. Начальнік ПУвпБВР Мацвей Хрысталюбаў заваяваў перамогу ў раённым этапе конкурсу “СУПЕРПРОФІ”.
– Мы ганарымся сваімі дасяг-неннямі і матываваным калектывам, знаходзячыся на шляху свайго актыўнага развіцця, стаўку робім на моладзь, якая нацэлена жыць і працаваць на карысць рудаўпраўлення. У дзень прафесійнага свята жадаю ўсім моцнага здароўя, сямейнага дабрабыту, высокіх вытворчых паказчыкаў і, традыцыйнае шахцёрскае пажаданне: каб колькасць спускаў раўнялася колькасці пад’ёмаў.
Галіна КАЗАК, фота аўтара.
Оставить комментарий