17 жніўня Міжнародны фестываль “Кліч Палесся” ў восьмы раз збярэ прыхільнікаў этнакультурных традыцый у аграгарадку Ляскавічы. Чым будзе здзіўляць фестываль сёлета, якія новыя ідэі і лакацыі чакаюць гасцей свята – абмяркоўвалі днямі на аргкамітэце ў Музеі прыроды нацпарка “Прыпяцкі”.
У рабоце аргкамітэта прынялі ўдзел намеснік старшыні Гомельскага аблвыканкама Дзмітрый Алейнікаў, старшыня камітэта ідэалагічнай работы і па справах моладзі аблвыканкама Дзяніс Язерскі, кіраўнікі зацікаўленых ведамстваў, прадстаўнікі СМІ.
Важныя дэталі маючай адбыцца ўрачыстасці прагучалі ў дакладах прадстаўнікоў адказнах службаў. Так, было агучана, што ў фестывальных мерапрыемствах прымуць удзел творчыя калектывы, майстры і рамеснікі з 8 рэгіёнаў Гомельскай вобласці і 4 раёнаў Брэсцкай.
Па інфармацыі генеральнага дырэктара нацыянальнага парку “Прыпяцкі” Юрыя Апановіча, тэрыторыя, на якой будуць праходзіць усе фестывальныя мерапрыемствы, поўнасцю гатова. У прыватнасці, вызначаны лакацыі для рыбалоўных спаборніцтваў, распрацавана праграма, зацверджаны прызавы фонд, падрыхтаваны ўзнагароды.
У самім парку “Прыпяцкі” будуць арганізаваны водныя экскурсіі, прагулкі на цеплаходах. У чаканні сваіх наведвальнікаў – сафары-парк і міні-кантактны заапарк.
– На гэты раз мы правядзем фестываль у фармаце каляндарна-абрадавых святаў палескага рэгіёну “Беларускі год – святаў карагод”. Мы яшчэ раз падкрэслім прыгажосць беларускіх традыцый, пераканаемся ў багацці народнага здабытку, – распавёў прадстаўнікам СМІ галоўны рэжысёр фестывалю Аляксандр Бандарэнка.
Як стала вядома, у рамках фестывалю адбудуцца выступленні аўтэнтычных калектываў дзвюх абласцей, конкурс прыгажосці і грацыі “Палеская Прыгажуня-2024”, выстава работ пераможцаў абласнога конкурсу-пленэру “Ажыўшая даўніна”, выставы “Паляванне і рыбалоўства” і “Турыстычнае Палессе”, конкурсы “Самы моцны паляшук” і “Палеская рыбалка”. Будзе арганізавана работа інтэрактыўных пляцовак пад адкрытым небам “Беларусь старажытная” і “Партызанскі край”. На працягу дня на канцэртных пляцоўках фестывалю са сваімі творчымі нумарамі выступяць самадзейныя і прафесійныя артысты.
Завяршыцца фестыль святочным феерверкам і гала-канцэртам IIІ рэгіянальнага конкурсу вакальных ансамбляў і аматарскіх харавых калектываў народнай манеры выканання “КаверХорШоу-2024”.
Гасцінныя Ляскавічы запрашаюць усіх стаць удзельнікамі яскравай падзеі!
Галіна КАЗАК. Фота Арцёма ГУСЕВА.
Оставить комментарий