Днямі старшыня райвыканкама Аляксандр Верамееў наведаў дыягнастычную станцыю УП “Белтэхагляд”, што працуе ў Муляраўцы. Мэта візіту кіраўніка раёна – аналіз ходу выканання пратаколу даручэнняў па забеспячэнні функцыянавання станцыі на тэрыторыі раёна.
Нагадаем, унітарным прадпрыемствам “Белтэхагляд” разглядаўся варыянт закрыцця станцыі тэхагляду ў Муляраўцы. Зразумела, што навіна ў жыхароў раёна выклікала нязгоду і вясною бягучага года на прыёме ў старшыні райвыканкама была агучана просьба захаваць аб’ект. Тэма знайшла падтрымку ў мясцовай улады. Так, па меркаванні кіраўніцтва раёна, у інтарэсах кіроўцаў уласнага аўтатранспарту, а таксама арганізацый і прадпрыемстваў раёна станцыя тэхагляду на Петрыкаўшчыне павінна быць: раён не маленькі і ездзіць на тэхагляд у суседнія Жыткавічы ці Калінкавічы, канешне, нязручна.
Напрыканцы вясны на сустрэчы з кіраўніцтвам УП “Белтэхагляд” была дасягнута дамоўленасць па стварэнні належных умоў для функцыянавання станцыі.
Перад кіраўніцтвам раёна стаяла задача правесці шэраг рамонтна-арганізацыйных мерапрыемстваў, перад УП “Белтэхагляд” – да ўсяго іншага абнавіць дыягнастычнае абсталяванне.
У час наведвання станцыі тэхагляду намеснік старшыні райвыканкама Аляксандр Дзягцяр далажыў аб выкананні мерапрыемстваў па забеспячэнні функцыянавання аб’екта, якія знаходзіліся ў зоне адказнасці раёна. Так, на сённяшні дзень завяршаецца падключэнне вады і ацяплення, ідзе рамонт у памяшканнях станцыі. Ужо адрамантавана і пафарбавана аглядавая яма, для зручнасці ўсталявана дадатковае асвятленне, працуе вентыляцыя. Як запэўніў дырэктар ДРБУ-112 Канстанцін Варэнікаў, да канца тыдня будуць заасфальтаваны пад’язныя шляхі да станцыі. Таксама ў бліжэйшы час на станцыі з’явіцца відэаназіранне.
– Адным словам, у жыхароў раёна няма нагоды для хвалявання: агульнымі намаганнямі ўсіх зацікаўленых аб’ект будзе захаваны, – пазначыў у час размовы нашаму карэспандэнту старшыня райвыканкама Аляксандр Верамееў.
Галіна КАЗАК. Фота аўтара.
Оставить комментарий