У сучасным свеце, дзе жыццё з кожным днём становіцца ўсё больш інтэнсіўным і дынамічным, добраўпарадкаванне тэрыторыі набывае асаблівае значэнне. Гэта працэс, накіраваны на стварэнне гарманічнага і камфортнага асяроддзя, якое садзейнічае не толькі фізічнаму, але і эмацыянальнаму дабрабыту жыхароў.
Добраўпарадкаванне тэрыторый такіх сацыяльных устаноў як пансіянаты, дзе кругласутачна пражываюць пастаяльцы, асабліва мае патрэбу ў стварэнні камфортнага і эстэтычна прывабнага асяроддзя.
На днях карэспандэнт “Петрыкаўскіх навін” наведала Капцэвіцкі сацыяльны пансіянат “Палескія сосны”, тэрыторыя якога – прыклад адказнага і творчага падыходу да зместу тэрыторыі, рэалізацыі новых, смелых задум і планаў.
– Перш за ўсё, дагледжаная і добраўпарадкаваная тэрыторыя спрыяе стварэнню неабходнай атмасферы, паслабленню і адпачынку нашых пастаяльцаў. Зялёныя зоны, кветнікі, прагулачныя сцежкі і прыгожыя альтанкі цешаць вока, забяспечваюць спакойнае баўленне часу, што асабліва важна для нашай установы, – дзеліцца падчас экскурсіі па тэрыторыі псіхолаг Вольга Корбут. – Такое мноства фарбаў, формаў, гэта свайго роду і тэрапія, якая праходзіць у рамках працоўнай рэабілітацыі пастаяльцаў. Многія з іх аказваюць дапамогу персаналу ў пасадцы, праполцы кветнікоў, участкаў.
Тэрыторыя пансіяната ўражвае і захапляе колькасцю архітэктурных формаў, зялёных насаджэнняў, незвычайным і крэатыўным падыходам у стварэнні кампазіцый.
Вольга Ігараўна падкрэслівае: кіраўнік установы пытанне добраўпарадкавання трымае на асаблівым кантролі і ў працэсе азелянення прымае ўдзел увесь працоўны калектыў. Кожны год з`яўляюцца новыя формы, кветкі, расліны, рэалізуюцца задумкі. У гэтым годзе высаджаны ўчастак кустоў парэчкі, закладзена тэрапеўтычная клумба, якая засаджваецца рознымі лячэбнымі травамі для карыстання пастаяльцамі.
Суразмоўца адзначыла, што такой працай калектыў пансіяната прытрымліваецца мэты стварэння камфортных умоў для пастаяльцаў, пазіцыянуе ўстанову, дзе жыццё вартае ва ўсіх адносінах.
Святлана СОБАЛЕВА,
фота аўтара.
Оставить комментарий