“Факір”
Адзін з жыхароў нашага горада працяглы час адчуваў сябе утаймавальнікам агню. Першапачаткова “падпаліў” шэраг гаражоў і пустуючы будынак гаспадарчага значэння. За ўчыненыя злачынствы быў затрыманы, кляўся, што спатыкнуўся і прасіў даць шанец скончыць каледж і выправіцца. З улікам узросту падазраванага, яго характарыстыкі да апошняга абрана мера стрымання, не звязаная з узяццем пад варту. Аднак першая чарка – і наш “Факір” здзяйсняе шэраг падпалаў падвальных памяшканняў у жылых дамах. Пры затрыманні растлумачыць свае злачынныя ўчынкі не змог.
На працягу бліжэйшых некалькіх гадоў за сваё свавольства па рашэнні суда ён будзе адбываць пакаранне ў папраўчай установе.
“Напэўна лішні раз паглядзеў фільм “Фарсаж”
У адзін з летніх дзён у Петрыкаўскі РАУС паступіла паведамленне аб спробе ўгону асабістага аўтамабіля. Следча-аператыўнай групай устаноўлена, што ў начны час група маладых хлопцаў пасля працяглага ўжывання спіртнога на вуліцы Дружба звярнулі ўвагу на аўтамабіль “Мазда”, які на няшчасце для ўладальніка і будучага гора-ўгоншчыка аказаўся незачынены. Малады чалавек, узгадаўшы навыкі вадзіцеля, атрыманыя ў каледжы, вырашыў завесці гэты аўтамабіль і пракаціць сваіх сяброў. З мэтай уключэння рухавіка пашкодзіў корпус рулявой калонкі, выкрываў капот, аднак аўтамабіль завесці не ўдалося.
Следства папярэджвае, што неправамернае завалоданне транспартным сродкам і паездка на ім прыводзіць да крымінальнай адказнасці па артыкуле 214 КК, якая прадугледжвае пакаранне ў выглядзе пазбаўлення волі на тэрмін да 10 гадоў.
“Я не скраў, я часова ўзяў, хацеў аддаць”
Такую фразу чуюць кожны раз следчыя пры допыце службовых ці матэрыяльна адказных асоб, высвятляючы, як былі выкрадзеныя грошы ці іншыя каштоўнасці, прыналежныя арганізацыі.
Чарговая крымінальная справа – і банальная сітуацыя: работнік аддзялення паштовай сувязі ЗАТ “Інтэрнэт-крама Еўраопт”, на працягу некалькіх месяцаў браў на асабістыя патрэбы грошы з касы. Магла і надалей працягваць здзяйсняць злачынства, аднак няўдача – прыехаў рэвізор. Як вынік – узбуджана крымінальная справа, урон у суме 1400 рублёў кампенсаваны, а ў дачыненні да няўдачлівага спецыяліста ўзбуджана крымінальная справа.
Георгій ВЕРАШЧАКОЎ, начальнік раённага аддзела Следчага камітэта.
Оставить комментарий