29 жніўня крымінальна-выканаўчая інспекцыя Беларусі адзначыла свой 90-гадовы юбілей. Гэта значная дата, якая падкрэслівае доўгую і важную гісторыю службы, асноўная задача якой – рэабілітацыя і накіраванне на шлях выпраўлення грамадзян, парушыўшых закон.
У крымінальна-выканаўчай інспекцыі Петрыкаўскага РАУС працуюць тры супрацоўнікі: начальнік Віктар Прышчэпа, інспектары Максім Галеня, Іван Каленік, прафесіяналы сваёй справы, якія выбралі для сябе няпросты, але высакародны шлях
Найстарэйшы работнік службы – Іван Каленік, у якога з 23-ох гадоў працоўнага стажу ў РАУС, 13 – у крымінальна-выканаўчай інспекцыі.
– Асноўная задача нашага падраздзялення – рэалізацыя мерапрыемстваў па адаптацыі ў соцыўм для асоб, якія вярнуліся з месцаў пазбаўлення волі, – дзеліцца Іван Валер’евіч. – Дзейнасць супрацоўнікаў інспекцыі ў лёсе асуджанага, разуменне яго праблем і патрэбаў дазваляюць выбраць правільны жыццёвы арыенцір і не дапусціць некаторым землякам здзяйснення супрацьпраўных учынкаў.
Суразмоўца адзначае: кожны чалавек індывідуальны, да ўсіх трэба шукаць свой падыход. Калі хтосьці не разумее патрабаванняў, варта прыняць пэўныя меры рэагавання. Ён і яго калегі стараюцца знайсці грамадзянам, якія сталі на шлях выпраўлення, прыдатную сферу дзейнасці, каб далейшае іх жыццё праходзіла толькі ў рамках дзеючага заканадаўства нашай краіны. Бо многія, з якімі даводзіцца працаваць работнікам службы, не вераць у тое, што ў іх ёсць магчымасць заняць годнае месца ў соцыўме.
– За кожным падуліковым, (на сённяшні дзень у базе дадзеных знаходзіцца 250 жыхароў раёна) чалавек са сваёй гісторыяй, сваімі памылкамі і, галоўнае, з патэнцыялам да выпраўлення. Калі мы бачым, што нашы намаганні дапамагаюць чалавеку змяніць сваё жыццё да лепшага, гэта самая вялікая ўзнагарода для нас, – дапоўніў інспектар.
Капітан з гонарам адзначае: калектыў інспекцыі згуртаваны, адной камандай працуюць над вырашэннем пастаўленых задач. На сённяшні дзень адна з такіх – задача, пастаўленая Прэзідэнтам краіны па працаўладкаванню асоб не занятых у эканоміцы.
Іван Валер’евіч свой выбар у прафесіі вызначыў яшчэ ў юнацтве. Пасля заканчэння першай гарадской школы, прайшоў службу ва ўнутраных войсках Беларусі. У 2003 годзе прыйшоў у раённы аддзел унутраных спраў на пасаду міліцыянера патрульна-паставой службы, потым была праца ў ізалятары часовага ўтрымання. Паралельна з працоўнай дзейнасцю скончыў Магілеўскі вышэйшы каледж МВД. У 2013 годзе прыйшоў у крымінальна-выканаўчую інспекцыю. Сёння з удзячнасцю ўспамінае калег, якія перадалі яму свой вопыт у гэтым напрамку – Івана Занкевіча, Уладзіміра Аскерка.
Іван Валер’евіч шчаслівы сем’янін. З жонкай выхоўваюць траіх дзяцей. Станіслаў – студэнт ВНУ, Валерыя і Уладзіслаў – навучэнцы 11 і 1 класа гарадской гімназіі. Нягледзячы, што муж і жонка маюць шчыльныя працоўныя графікі – Алена працуе медсястрой у Петрыкаўскай ЦРБ – яны знаходзяць магчымасць для сумеснага правядзення часу з дзецьмі, з’яўляюцца прыкладам сямейнага шчасця, які адлюстроўваецца ў дзецях.
– Карыстаючыся выпадкам віншую са святам ветэранаў працы крымінальна-выканаўчай інспекцыі, калег па працы, – дадае суразмоўца. – Жадаю, каб кожны наш новы дзень пачынаўся з перамог, а завяршаўся ля хатняга ачагу, дзе нас чакаюць самыя родныя людзі.
Святлана СОБАЛЕВА, фота аўтара.
Оставить комментарий