С 24 па 30 сакавіка ў краіне прайшоў тыдзень дзіцячай і юнацкай кнігі і музыкі пад дэвізам “Ад кнігі да мары”.
Адкрыццё тыдня на Петрыкаўшчыне па шматгадовай традыцыі адбылося на базе раённага Дома культуры. Мерапрыемства прайшло ў выглядзе вялікага свята, на якім разгарнуліся тры лакацыі: у фае ўстановы, у чытальнай зале бібліятэкі, на сцэне канцэртнай залы. У сустрэчы з юнымі чытачамі прынялі ўдзел работнікі раённай бібліятэкі, Дома культуры, дзіцячай школы мастацтваў, раённага Дома рамёстваў, Петрыкаўскага гісторыка-краязнаўчага музея. Выставы кніг, баўленне часу з казачнымі героямі, майстар-класы, настольныя гульні, ігра на музычных інструментах – не ўвесь пералік прапанаванага ўстановамі культуры ў той дзень для дзяцей.
Дырэктар Петрыкаўскай сеткі публічных бібліятэк Таццяна Галіцкая ў сваім звароце да ўдзельнікаў адзначыла: кніга і музыка – гэта цэлы свет. Свет дабра, неверагодных прыгод, сапраўдных сяброў і добрага настрою. Таццяна Пятроўна расказала пра вытокі гісторыі зараджэння “Тыдня дзіцячай і юнацкай кнігі і музыкі”, павіншавала гасцей мерапрыемства са святам, пажадала ім творчых поспехаў, цікавых канікул у кампаніі любімых выданняў.
У час правядзення мера-прыемстваў у райцэнтры былі ўручаны граматы і падарункі самым актыўным юным чытачам раённай бібліятэкі.
Імі сталі: у намінацыі “Лепшы чытач года” – Анастасія Іванова, “За актыўны ўдзел у бібліятэчных мерапрыемствах” – Ульяна Несцярчук, Вера Васільева, Ксенія Фядзяніна (на фота). Таксама ўзнагароды знайшлі Варвару Дзегцярову і Сафію Грыб.
Цікава і займальна прайшоў Тыдзень дзіцячай і юнацкай кнігі і музыкі ва ўсіх бібліятэках Петрыкаўшчыны. У сельскай мясцовасці былі арганізаваны разнастайныя выставы і агляды кніжных навінак, літаратурныя гадзіны і вандроўкі. Несумненна: падрастаючае пакаленне ўзяло для сябе многа новага ад такіх сустрэч.
Мне давялося пабываць на адным з мерапрыемстваў ва ўстанове адукацыі, у час якога вялася дыскусія: ці патрэбна чытаць кнігі сучаснаму пакаленню школьнікаў.
Некаторыя адказы юнакоў і дзяўчат узяла на запіс.
Аляксандра: карысць чытання, лічу, намнога вышэй, чым прагляд серыялаў і захапленне гульнямі ў сацыяльных сетках. Чытанне павялічвае слоўнікавы запас. Калі вы чытаеце творы розных жанраў, то сутыкаецеся са словамі, якія звычайна не выкарыстоўвалі. Таму значэнне кнігі ў нашым жыцці, несумненна, вялікае. Гэта ключ да ведаў.
Мікіта: кніга яшчэ і машына часу, якая можа паведаць пра мінулае, расказаць пра цяперашняе, пафантазіраваць наконт будучыні.
Анастасія: кніга і музыка вучаць нас думаць, марыць, фантазіраваць. Нездарма Францыск Скарына казаў: “Любіце кнігу, бо яна – крыніца мудрасці, ведаў і навукі”.
Калі абагуліць, галоўны вынік, зроблены ўдзельнікамі мерапрыемстваў у час правядзення Тыдня на Петрыкаўшчыне: кніга – самы высокі здабытак людской мудрасці. Яна адкрывае акно ў вялікі свет.
Святлана СОБАЛЕВА,
фота аўтара.
Оставить комментарий