Рабочы тыдзень Прэзідэнта Беларусі Аляксандра Лукашэнкі пачаўся з сустрэчы з кіраўніком Рэспублікі Саха (Якуція) Айсенам Нікалаевым, у час якой лідар краіны прапанаваў універсальную формулу супрацоўніцтва кіраўнікам расійскіх рэгіёнаў.
Прэзідэнт Беларусі цёпла прывітаў кіраўніка расійскага рэгіёну на гасціннай беларускай зямлі: “З вялікай цікавасцю ставімся да вашай дэлегацыі, таму што і зямля ў вас такая незвычайная, рамантычная, і для мяне ў тым ліку, хаця я вельмі добра ведаю Расію. Вялізныя прасторы, найбагатыя прыродныя рэсурсы. І, галоўнае, людзі ў вас вельмі мужныя, працавітыя”. У гэтым сэнсе Прэзідэнт звярнуў увагу на некаторую агульнасць рыс народаў Беларусі і Якуціі, асабліва ў іх мэтанакіраванасці.
Што датычыцца сфер узаемных інтарэсаў, то яны, паводле слоў Прэзідэнта, могуць быць вельмі разнастайнымі. А зараз яны яшчэ і прадыктаваныя пэўным ціскам з боку Захаду. “Я маю на ўвазе заходнія фашысцкія санкцыі. Як я гавару кожнаму расійскаму губернатару: калі нешта трапіла пад забарону, купляйце беларускае, – адзначыў Аляксандр Лукашэнка. – Мы, напэўна, на шмат працэнтаў зможам замясціць вам заходнія тавары”. Калі гаварыць у гэтым сэнсе пра Якуцію, якой патрэбна замена імпартнай тэхнікі для горназдабываючых прадпрыемстваў, то Беларусь яе вырабляе. І маштабныя інвестыцыйныя праекты ў гэтай галіне дазваляюць нарасціць пастаўкі ў некалькі разоў. “Знакамітыя кар’ерныя самазвалы беларускага аўтазавода БЕЛАЗ дапамогуць перавыканаць усе планы Якуціі па павелічэнні здабычы карысных выкапняў. Нашы велікагрузы зарэкамендавалі сябе выдатна ў рэгіёнах Расійскай Федэрацыі”, – пазначыў Прэзідэнт.
Размова таксама ішла аб магчымасцях па пастаўцы горназдабываючага абсталявання. У прыватнасці, аб прадукцыі прадпрыемства “Ніва-Холдынг” з Салігорска, якая з’яўляецца не проста выдатнай альтэрнатывай заходнім узорам, але і ўлічвае спецыфіку працы і патрабаванні любога пакупніка. “Мы працуем комплексна. Пры вашым жаданні і гатоўнасці зрабіць стаўку на нашы машыны і абсталяванне Беларусь зможа арганізаваць у Якуціі мультыбрэндавы сэрвісны цэнтр, – запэўніў Аляксандр Лукашэнка. – Галоўнае, каб аб’ёмы былі для гэтага”.
Галіна КАЗАК, фота БелТА.
Оставить комментарий