Акцыя “Нашы дзеці” праходзіць у Беларусі пад патранатам і па ініцыятыве Прэзідэнта. Да акцыі далучыліся і актывісты Петрыкаўшчыны.
Так, 17 снежня члены раённага Савета старшакласнікаў пад кіраўніцтвам педагогаў раённага Цэнтра творчасці дзяцей і моладзі наведалі педыятрычнае аддзяленне Петрыкаўскай ЦРБ, каб павіншаваць маленькіх пацыентаў з надыходзячымі навагоднімі святамі.
У залежнасці ад узросту дзеткам былі ўручаны розныя падарункі, якія былі сабраны ўстановамі адукацыі нашага раёна: цацкі, лялькі, машынкі, альбомы, фламастары, кнігі з казкамі. Самыя маленькія саромеліся, але з цікавасцю разлядалі рэчы, змешчаныя ў каробцы, і з усмешкай на твары прымалі падарункі.
Сваімі думкамі наконт важнасці правядзення дадзенай акцыі з намі падзялілася Лізавета Прыходзька, член сектара СМІ раённага Савета старшакласнікаў:
– Для ўсіх дзяцей навагоднія святы асацыіруюцца з радасцю, чараўніцтвам і сямейнай цеплынёю. Упэўнены, што наша наведванне падняло настрой і няхай на кароткі прамежак часу, але нам удалося стварыць атмасферу свята. Кожнаму чалавеку прыемна ўвага, і ўсе з задавальненнем атрымліваюць падарункі, незалежна да ўзросту.
Як вядома, эмацыянальны настрой адыгрывае вельмі важную ролю ў працэсе выздараўлення і паляпшае стан здароўя.
Удзел у акцыі – гэта крок да таго, каб зрабіць свет лепшым. А для дзіцяці, якое аказалася ў цяжкай жыццёвай сітуацыі, гэта можа стаць сапраўдным праменьчыкам святла ў цёмным царстве хваробы.
Сапраўды, падобныя мерапрыемствы надоўга застаюцца ў памяці. Дзеці, як ніхто іншы, заўсёды шчырыя ў сваіх эмоцыях, таму бачыць іх шчаслівыя твары – сапраўднае шчасце для кожнага з нас.
Давайце разам рабіць добрыя справы!
Анастасія КІСЕЛЕВА,
фота аўтара.
Оставить комментарий