З мэтай прадухілення надзвычайных здарэнняў у час купання ў летні перыяд начальнік выратавальнай станцыі, інспектар сектара прапаганды Петрыкаўскага РАНС і карэспандэнт раённай газеты “Петрыкаўскія навіны” правялі чарговы рэйд па вадаёмах Петрыкаўскага раёна.
Вада памылак не даруе. Як адзначыў інспектар Петры-каўскага РАНС Сяргей Шамра, асноўнымі прычынамі гібелі людзей на водах па-ранейшаму з’яўляецца ўжыванне спіртных напояў, купанне ў забароненых месцах і грэбаванне правіламі бяспечных паводзінаў.
“Адпачынак не па правілах у чарговы раз абярнуўся вялікай трагедыяй на вадзе. У Гомельскай вобласці патанулі двое падлеткаў. Усё адбылося на невялікім возеры ў Жлобіне. Дзеці 14 і 15 гадоў праігнаравалі забарону на купанне ў вадаёме, не разлічылі свае сілы і загінулі. Трагедыя – жорсткі ўрок усім тым, хто яшчэ сумняваецца, плаваць у забароненых месцах ці не.
У сувязі з тым, што адбылося, чарговы раз нагадаю пра неабходнасць выконваць элементарныя правілы паводзін падчас адпачынку каля вадаёмаў”, – адзначыў участковы інспектар.
Падчас рэйду па гарадскіх пляжах Сяргей Шамра падкрэсліў, што нельга купацца ў забароненых месцах. Таксама гэтага не варта рабіць ля стромкіх абрывістых берагоў з моцнай плынню, у забалочаных месцах, у штармавое надвор’е і падчас навальніцы. Небяспечна для жыцця ныраць у незнаёмых месцах, заходзіць у ваду ў стане алкагольнага ап’янення.
Адпачываючым раздалі спецыяльныя буклеты з інфармацыяй пра алгарытм дзеянняў пры ўзнікненні пазаштатных сітуацый з нумарамі тэлефонаў выратавальных службаў.
Далей у час рэйду супрацоўнікі выйшлі на ваду для агляду берага ракі.
Калі хочацца адпачыць у прахалоднай рацэ ў спякоту, гэта варта рабіць на спецыяльна абсталяваных пляжах, дзе дзяжураць работнікі выратавальнай станцыі, менавіта яны штогод ратуюць дзясяткі жыццяў.
І яшчэ раз нагадваем, што купанне дазволена толькі ў спецыяльна абсталяваных месцах. У Петрыкаве гэта гарадскія пляжы № 1 і № 2, а таксама пляж у Капаткевічах.
Сумная статыстыка
У 2023 годзе ў Беларусі на вадзе загінула 339 чалавек, у тым ліку 21 непаўналетні. Годам раней лічбы былі наступныя: патанула 386 чалавек, з іх 25 дзяцей.
Паводле інфармацыі выратавальнікаў, большая частка загінуўшых знаходзілася ў стане алкагольнага або наркатычнага ап’янення, у тым ліку і двое непаўналетніх.
Акрамя таго, летась выратавалі 241 чалавек.
Оставить комментарий