На мінулым тыдні ў гарадскім пасёлку Капаткевічы пад кіраўніцтвам старшыні раённага Савета дэпутатаў Віталія Пілера прайшло выязное пасяджэнне прэзідыума раённага Савета дэпутатаў дваццаць восьмага склікання.
Члены пастаяннай камісіі па экалогіі, развіцці і добра-ўпарадкаванні населеных пунктаў пры ўдзеле дэпутата Гомельскага абласнога Савета дэпутатаў Людмілы Гошка і запрошаных зацікаўленых асоб разглядалі на месцы зварот ураджэнкі гарпасёлка, які паступіў у Савет Рэспублікі Нацыянальнага сходу Рэспублікі Беларусь. Разам з дэпутацкім корпусам раёна ў сітуацыі разбіраўся і наш карэспандэнт.
Пасля разгляду пісьмовага звароту, удзельнікі выязнога пасяджэння выехалі на аб’екты, якія трапілі пад крытыку.
Што да канала па вуліцы Меліярацыйная, то пра яго яшчэ вясною пісала наша выданне. Пасля звароту мясцовых жыхароў у сакавіку-красавіку месяцы работы па ачыстцы канала ад драўняна-хмызняковай расліннасці пачаліся ўздоўж вуліцы Камсамольская. У жніўні-верасні праводзілася ачыстка цэнтральнага канала ад вуліцы Меліярацыйная да завулка Кастрычніцкі. Работнікі райжылкамгасу не абмежаваліся правядзенннем толькі санітарных работ – на адкрытым канале па Меліярацыйнай былі адноўлены цагляныя сценкі калодзежа, што мяжуе з уездам у гарпасялковую бальніцу. Як запэўніў дырэктар ДП “Петрыкаўскі райжылкамгас” Сяргей Гайчук, работы па ачыстцы існуючых каналаў гарпасёлка будуць працягнуты.
У час наведвання вуліцы Меліярацыйная Петрыкаўскаму ДРБУ-112 дадзена даручэнне правесці работы па высотнай рэгуліроўцы і падняццю трох водаправодных і каналізацыйных калодзежаў да ўзроўню дарожнага пакрыцця. На момант падрыхтоўкі артыкула да друку даручэнне выканана.
Наступны наведаны аб’ект – гарпасялковыя могілкі. Па пытанні ўтрымання і добраўпарадкавання справаздачу трымалі дырэктар камунгасу, на чыім балансе знаходзіцца аб’ект, і старшыня сельвыканкама, чыімі намаганнямі разам з мясцовымі жыхарамі таксама наводзіцца парадак. Так, па інфармацыі Святланы Сеніковіч, з чэрвеня па жнівень было праве-дзена 4 суботнікі па навядзенні парадку з прыцягненнем арганізацый, прадпрыемстваў і насельніцтва, у час якіх выдалена драўняна-хмызняковая расліннасць, праведзены рамонт і афарбоўка агароджы, абкошана тэрыторыя.
Работнікі райжылкамгасу, па словах дырэктара Сяргея Гайчука, двойчы наводзілі парадак на аб’екце. Што да падкоскі, то яна праводзіцца па меры неабходнасці. На пытанне, ці ёсць скаргі з боку іншых грамадзян па належным утрыманні могілак, адказ быў адмоўным.
Па факце, на момант наведвання аб’ект знаходзіўся ў здавальняючым стане.
Што да пытання аднаўлення работы піцэрыі “Гурман”, якое таксама знайшло адлюстраванне ў звароце заяўніцы, то ўжо на пад’ездзе да аб’екта становіцца зразумелым: гэта наўрад ці магчыма. Наша меркаванне знаходзіць пацверджанне ў інфармацыі, прадстаўленай дырэктарам Жыткавіцкага філіяла Гомельскага абласнога спажывецкага таварыства Валянцінай Века, у чыёй уласнасці знаходзіцца аб’ект. Як пазначыла Валянціна Паўлаўна, больш за паўтара гады аб’ект не ажыццяўляе сваю дзейнасць у сувязі з тым, што знаходзіцца ў аварыйным стане і не адпавядае патрабаванням, устаноўленым нарматыўна-прававымі актамі. Так, на аб’екце не працуе сістэма гарачага і халоднага водазабеспячэння, каналізацыя, ацяпленне.
У час тэхнічнага агляду будынка піцэрыі, удзельнікамі выязнога пасяджэння ўстаноўлены факт нездавальняючага стану даху, сцен, знешняга і ўнутранага аздаблення будынка. Улічваючы ўсе агучаныя і выяўленыя факты, члены камісіі пагадзіліся з уласнікам аб’екта: выкарыстанне піцэрыі не мэтазгодна. Па інфармацыі дырэктара філіяла, у цяперашні час праводзіцца работа па падрыхтоўцы неабходных дакументаў для здачы ў арэнду (продаж) будынка. Намеснік старшыні райвыканкама Аляксандра Янчанкава дадала, што сацыяльныя стандарты па аб’екце грамадскага харчавання ў Капаткевічах выконваюцца. Так, у гарпасёлку маецца сталовая ААТ “Чалюшчавічы”, дзе аказваюцца паслугі грамадскага харчавання па заказах.
Такім чынам, даводзіцца канстатаваць, што не ўсё заўвагі заяўніцы знайшлі сваё пацверджанне. Пісьмовы адказ па факце праведзеных работ і аргументы па немэтазгоднасці іншых будзе дасланы на адрас грамадзянкі ў вызначаны заканадаўствам час.
Галіна КАЗАК, фота аўтара.
Оставить комментарий