Днямі на адрас рэдакцыі прыйшоў ліст ад кіраўніцтва Інстытута пагранічнай службы Рэспублікі Беларусь, у якім распавядаецца пра нашага земляка, выпускніка гімназіі Данііла Грыба. Такія допісы заўсёды знаходзяць жывы водгук у калектыва рэдакцыі, таму з задавальненнем публікуем матэрыялы.
Як адзначыла ў лісце кіраўніцтва навучальнай установы, старшы сяржант Данііл Грыб, сёлетні выпускнік Інстытута пагранічнай службы, цвёрда перакананы: сучасны пагранічнік – гэта прафесіянал, які штодня адточвае сваё майстэрства і ўдасканальвае веды. Данііл яшчэ ў школьныя гады захапляўся гераізмам і подзвігамі воінаў-пагранічнікаў, якія ўдзельнічалі ў баях за вызваленне Петрыкаўшчыны. Малады чалавек з дзяцінства, дзякуючы аповядам старэйшага брата, афіцэра-пагранічніка, капітана 2-га рангу Яўгена Жукоўскага, ваенна-служачага Гомельскай пагранічнай групы, не па чутках ведаў пра службу пагранічніка. Таму прафесійны выбар юнака нельга лічыць выпадковым, Данііл быў цвёрда перакананы: афіцэр-пагранічнік – гэта яго лёс і лад жыцця.
“Скончыўшы ў 2020 годзе Петрыкаўскую гімназію, з трывалым багажом ведаў хлопец паступіў у Інстытут пагранічнай службы. Добрая спартыўная падрыхтоўка юнака адыграла сваю ролю – ён годна пераносіў высокія фізічныя нагрузкі на першапачатковым этапе і ў далейшым актыўна і вынікова ўдзельнічаў у розных інстытуцкіх і гарадскіх спартыўных мерапрыемствах.
Вопыт дзелу ў грамадска-культурным жыцці гімназіі спатрэбіўся і ў Інстытуце, бо развіццё мастацкай самадзейнасці адыгрывае важную ролю ў выхаванні курсантаў. Аднак, прымаючы актыўны ўдзел у спартыўных і творчых мерапрыемствах, курсант не забываўся надаваць належную ўвагу і вучобе. Старанне і зацятасць Данііла былі заўважаны кіраўніцтвам курса. Пасля курса маладога байца і да самага выпуску наш земляк выконваў абавязкі камандзіра аддзялення, – чытаем у лісце ад кіраўніцтва Інстытута. – На практычных занятках і ў час стажыроўкі на Дзяржаўнай граніцы цікавасць да будучай прафесіі толькі ўзмацнялася, а характар – гартаваўся. Дзякуючы Інстытуту пагранічнай службы, Данііл набыў шмат сяброў, змог рэалізаваць свой патэнцыял, наведаў мноства ўрачыстых мерапрыемстваў, атрымаў неабходныя для афіцэра-пагранічніка веды, дасягнуў высокіх вынікаў у службе па ахове Дзяржаўнай граніцы, вучобе, спорце, грамадскай дзейнасці, за што заахвочваўся камандаваннем Інстытута і Дзяржпагранкамітэта”.
Прыемна было даведацца, што за перыяд навучання наш зямляк атрымаў мноства ўзнагарод: ён пераможца конкурсу сярод курсантаў сілавых структур “Курсант Года” ў намінацыі “Спартсмен года-2023”, неаднаразовы прызёр навуковых канферэнцый, прызёр спаборніцтваў Інстытута па цяжкай атлетыцы і армрэстлінгу.
Да выпуску застаюцца лічаныя дні. Зусім хутка маладога афіцэра чакае тая самая пагранічная застава, на якой ён пачне свой цяжкі, але ганаровы афіцэрскі шлях. І мы ўпэўнены, што Данііл будзе з гонарам выконваць свой службовы абавязак – абараняць святыя рубяжы нашай Радзімы!
Падрыхтавала Галіна КАЗАК.
Оставить комментарий